Көрәшче батырларыбыз арабызга кайтты...

Беренчедән, ярышларыбыз Нормадан янә Балтачка кайтса, икенчедән, ярышларыбыз моннан соң шушы җирлектә туып-үсеп, Нормабаш һәм Кили авылларыннан махсус хәрби операциягә китеп, һәлак булган көрәшче-батырларыбыз Илдар Зарипов һәм Раниф Гарифуллиннар истәлегенә дип узачак. Димәк, батырларыбыз исемен мәңгеләштерудә зур адым ясалды.

Бу уңайдан, спорт остабыз Илдарның бертуган энесе Илдусның зур тырышлыгын искә алмый мөмкин тугел. Үзе дә әле көрәшчеләр сафында булган Илдус тырышлыгы белән бу төбәктән 2 команда чыгыш ясады. Аның беренчесе хуҗалык данын якласа, икенчесе Нормабаш авылы данын яклады. Уңышлары да күз алдында. Рәхмәт аңа. Өй саен үзе йөреп, “йокыга” китеп барган көрәшчеләрне дә, районыбыз киләчәге булган яшьләребезне дә уятып җибәреп, барысын да келәмгә бастырды Илдус.

Инде ярышыбызга килсәк, безнең халык ел саен көтеп ала инде бу бәйгене. Чөнки инде тарихта гына калган Бөек Октябрь бәйрәмнәрен күңелләребездә яңартучы бердәнбер ярыш булып кала бирә. Рәхмәт Булат Сәйдәш улына да. Әтисе белән башлап җибәргән ярышларыбызны сүндермичә алып барганы өчен. Быелгы ярышларыбызга узган елгыдан күбрәк көрәшче килүе дә күңелләребезгә җылылык кертте. 17 төбәктән җыелган 78 көрәшче кызып-кызып бил алыштылар. Соснадан финалга кадәр килеп җиткән Данис Зариповның җитди травма алуы гына борчуга салды. Вакытында тиз арада сәламәтләнеп, арабызга кире кайтырга язсын инде аңа.

Инде тарихи бәйгебезнең җиңүчеләре белән дә танышып узыйк.
60 кг.га кадәр: Нияз Әскәров /Чепья/, Ленар Әүхәдиев /Бөрбаш/, Фәһим Мөхәммәдиев /Смәел/. 
65 кг.да: Ислам Бурашов /Нөнәгәр/, Кәрим Гарипов /Чепья/, Рафил Вафин /Нормабаш/.
70 кг.да: Айзат Апанов /Салавыч/, Аяз Йосыпов /Чепья/, Фирдүс Галимуллин /Смәел/. 
75 кг.да: Рәнис Зарипов /Чепья/, Ранил Ганиев /Норма/, Рафис Вафин /Нормабаш/.
85 кг.да: Булат Галиев /Чепья/, Алмаз Гыйльметдинов /Арбор/, Илдар Абдуллин /Норма/. 
100 кг.да: Рөстәм Сиразиев /Чепья/, Адел Фазылҗанов /Норма/, Илнар Фазылҗанов /Чепья/. 
Авыр үлчәүдә: Радис Сәмигуллин /Нөнәгәр/, Булат Вафин /Чутай/, Дилүс Сабиров /Карадуган/.

Җиңүчеләребезне барлаганда, күңел шуңа сөенде - яшәреп бара көрәшебез. Димәк, әле киләчәгебез өметле. Команда беренчелегендә ел да бирелә тәкә бу юлы да Чепьяга китте. Калган урыннарны Норма, Смәел, Нормабаш, Чутай командалары бүлеште.

Нурзада Сәмигуллин. Балтач бистәсе.