Көрәшчеләр, Федерация Кубогына да әзерләнегез!

Көрәш буенча Федерация Кубогына турнир быел ТР Авыл хуҗалыгы һәм азык-төлек министрлыгы призларына уза торган ярышлар урынына үткәрелергә тиеш иде. Шул ук үлчәү категорияләрендә, шул ук шәхси-команда турниры булып. Мәгълүм сәбәпләр аркасында ул уздырылмады. Әмма ТР Көрәш федерациясе аны барыбер оештырырга кара кылган. Бу хакта безгә федерациянең башкарма директоры Марсель Таһиров хәбәр итте. Әлегә ярыш Казанда 10-12 декабрь көннәрендә узар дип көтелә. "Татарстанның спорт министрлыгы, спорт министрының беренче урынбасары Хәлил Шәйхетдинов белән сөйләшеп, аңлашып эшлибез. Ләкин бер нәрсә бар: бар да республикадагы санитар-эпидемиологик вазгыятькә, Роспотребнадзор куйган таләпләргә бәйле. Без, беренче чиратта, көрәшчеләрне дә, тамашачыларны да саклап эш итәргә тиеш. Әлегә уздыру планлаштырыла", диде Марсель Шәрипҗан улы.

Башкарма директор тагын бер яңалык җиткерде. Көрәш буенча Россия чемпионатының узу датасы һәм урыны да мәгълүм. Ил чемпионаты, узган елдагы кебек, Идел буе физкультура һәм спорт академиясе базасында үтәчәк. 3-5 декабрь көннәрендә. Татарстан данын әлеге ярышларда республика чемпионатын откан көрәшчеләр яклаячак, дип тәгаенләде М.Таһиров.

Кыскасы, Яңа елга кадәр атна саен көрәш көтә икән.