Татарстан Президенты кубогы Севастопольгә китте

Футбол буенча ТР Президенты кубогына ярышлар тәүге тапкыр 1995 елда уздырылган иде. Ул вакытта почетлы трофейны Минск «Динамо»сы яулады. Әмма турнир ни сәбәпледер традициягә әйләнеп китә алмады. Ниһаять, 19 елдан соң ул яңартылды. Тик бу юлы да кубокны үзебездә калдыра алмадык. Чаллының «Гренада» паркы стадионында узган финал матчы Кырым спортчыларының җиңүе белән тәмамланды. Хәлиткеч уенда Севастополь җыелма командасына 1:2 исәбенә оттырган «Рубин-2»гә икенче урын белән генә канәгатьләнергә калды. Өченче урында - Чаллының «КамАЗ» футболчылары. Әмма турнирның төп әһәмияте - командалар арасында дуслык элемтәләрен ныгытуда, тәҗрибә алмашуда, ди оештыручылар.