«Зенит-Казан» «Кузбасс»ны 34нче тапкыр җиңде!

Әйе, ул уенда Зенит-Казанның күп кенә проблемалары күренде, ләкин плей-оффка кадәр аларны бетерү өстендә эшләячәкләре шик тудырмый.  Кузбасс командасы белән Зенит-Казан бер-берсенә каршы 40 тапкыр уйнаганнар һәм Зенит-Казан бары тик 7 уенны гына җиңелгән. Бүген дә әлеге гадәтне бозмыйча Зенит-Казан 3:0 исәбе белән  җиңде
Беренче партия Казан командасы файдасына 21:25 исәбе белән тәмамланды. Артык тир түкмәде кебек бу партиядә Зенит-Казан, ләкин ахырга таба Кузбасс уенчылары куып тотырга тырышты. Икенче партия Кузбасс уенчысы Тимофей Тихоновның 3 эйсы белән башланып китте. Әлеге вакыйгадан соң Алексей Вербов таймаут алып, команданы тынычландырды. “Подачаларны алмаслык түгел бит, егетләр. Прием вакытында тупны өскәрәк җибәреп, яхшы позицияләрне алыгыз” – дигән фикерен җиткерде. Исәп  7:4 булганда аренада ут сүнеп алды. Уен туктап торды һәм бу тизлекне бераз бозды. Әмма бу пауза Зенит-Казанга хәл җыеп, Кузбассны куып тотырга ярдәм итте. Берничә яхшы һөҗүм һәм исәп инде 10:10. Партия барган вакытта бер кызык хәл булды: Дмитрий Волков подача биргәндә хөкемдарлар “заступ” дип, тупны Кузбасска бирергә җыенган иделәр. Ләкин Дражен Лубурич, подача вакытында заступ булмады дип, видеопросмотр алырга кушты. Хөкемдар үзенең карарын үзгәртеп, баллны Зенитка бирде.  Исәп 18:20 булганда Казан командасы таймаут алды. Әйе, хуҗаларга алга китергә мөмкинлек биргән булсалар, куып тоту авыр булыр иде. Ләкин Дмитриий Волковның рәттән барган 3 һөҗүме Зенит-Казанны алга чыгарды. Нәтиҗәдә партия 22:25 исәбе белән тәмамланды. Кузбасс составында Тимофей Тихоновны билгеләп үтергә кирәк. Бүгенге уенда ул 12 очко җыйды һәм 42% һөҗүме уңышлы булды.
Өченче партиядә Волков урынына Михаил Лабинский чыкты. Дмитриий Волков кулын бозлы повязка белән бәйләп куйган иде.  Аңа да карамастан бу партия башкаларына караганда җиңелрәк барды. Кузбасс командасы блокта Казан командасының һөҗүменә каршы тора алмады. Лабинский үз чиратында соңгы партиядә 3 очко җыйды. Ә кулын авырттырган Дмитрий Волков беренче ике партиядә  13 очко җыеп 50% уңышлы һөҗүм ясады. Шулай ук Зенит-Казан составында Андрей Сурмачевскийны (13 очко, 63% уңышлы һөҗүм) һәм Дражен Лубуричны (8 очко һәм 50% уңышлы һөҗүм) искә алырга кирәк. Кузбасс командасының 39% һөҗүме уңышлы булса, Зенит-Казанның 51% һөҗүме уңышка ирешеп, очко китерде.
Киләсе уен 7 февраль Локомотивка каршы  булачак. Әлеге команда Зенит-Казанны бу сезонда җиңгән бердәнбер команда.

Илнар Камаев