Коронавирустан һәм грипптан вакцинаны бер үк көнне кадатырга ярыймы?

- Соңгы тәүлектә 245 кешенең коронавирустан авырый башлавы ачыкланды. Көн саен 8 мең тест үткәрелә. Авыручыларның 95 проценты “Омикрон” штаммын, ә 5 проценты “Дельта” штаммын йоктырган. Татарстанда әлегә грипп теркәлмәде, узган ел 25 октябрьдә күзәтелә башлаган иде. Салкын тидереп авыру билгеләре булган 5 мең бала мәгариф учреждениеләреннән өйләренә кайтарып җибәрелгән, - диде Роспотребнадзорның Татарстан буенча идарәсе җитәкчесе урынбасары Любовь Авдонина.
Ул коронавируска һәм гриппка каршы вакцина ясатуның мөһимлеген искәртте.
- Коронавируска һәм гриппка каршы вакциналарны бер үк көнне ясатырга ярыймы? - дип, “Шәһри Казан” газетасы исеменнән сорау бирдем.
- Covid-19га һәм гриппка каршы вакцинаны бер үк көнне ясатырга ярый. Вакциналар бер-берсенә каршылык тудырмый. Шулай ук, коронавирус яки грипп вакцинасын 1 ай вакыт узганнан соң да ясатырга була. Татарстанда вакцина бар, 1 миллионнан артык дозада вакцина булдырылды, - дип җавап кайтарды Любовь Авдонина.
Татарстанның сәламәтлек саклау министры урынбасары – Казан шәһәре буенча сәламәтлек саклау идарәсе җитәкчесе Владимир Жаворонков әйтүенчә, республикада шушы арада 587 кеше коронавирус авыруыннан дәваланып чыккан.
- Республика буенча коронавирустан авыручыларга билгеләнгән “кызыл зона”ларда койкалар 11 процентка буш. Өлешчә мобилизация буенча алынган ир-егетләргә җыелу пунктларында график нигезендә коронавируска каршы вакциналар ясала, проблема юк, - диде Владимир Жаворонков.
- Коронавирустан авыручыларны дәвалау аерым тәртиптә үткәреләме. Кешеләрдән үзләренә дарулар сатып алу мәҗбүр ителмиме? - дип, чираттагы соравымны юлладым.
- Коронавирустан авыручыларны дәвалау, фәкать, “кызыл зона”ларда гына үткәрелә. Бер кешедән дә дарулар сатып алу таләп ителми. Медицина учреждениеләре дарулар белән тәэмин ителгән, - дип тынычландырды Владимир Жаворонков.