Югары катта яшәү сәламәтлек өчен куркыныч?

Табиб-кардиолог Асият Хачирова мәгълүматлары буенча, биек биналарда озак еллар дәвамында яшәү йөрәк-кан тамырлары системасы торышына тискәре йогынты ясарга, шулай ук психик тайпылышларга китерергә мөмкин.

Шул ук вакытта 100 метрдан артык биеклектәге биналарда берничә көн яки 2-3 ай яшәү куркыныч түгел, мондый йортларда даими яшәгән кешеләрдә сәламәтлек белән бәйле проблемалар күбрәк күзәтелә, дигән фикердә Хачирова. Биеклектән курку, тәрәзәдән аска карау мөмкинлеге булмау –моның төп сәбәбе, ди табиб. Моннан тыш, биек йортларда һава агымы бары тик вентиляция системасы буенча гына килә, бу инфекцияләрнең тиз таралуына китерергә мөмкин.

– Игътибарга лаек тагын бер момент – куркынычсызлык максатларында мондый йортларда тәрәзәләрне ачып булмый. Ә ясалма механик вентиляциянең кечкенә җитешсезлеге бар – фатир эчендәге һава коры була. Кыш көннәрендә, бу бигрәк тә, хәтәр, вирус йоктыру куркынычы бермәбер арта, – дигән фикердә табиб-кардиолог.