Менә сиңа кадак?!.

Россиянең Федерация Советында чит ил продукциясенә алмаш булдыру мәсьәләсе тикшерелде. Федерация Советы рәисе Валентина Матвиенко әлеге утырышта илебездә кадак җитештерелмәвенә шаккатканлыгын яшермәде.
— Минем өчен ниндидер бер ачыш булды бу,- ди дулкынланып, Валентина Матвиенко.- Бездә кадаклар чит илнеке, кайсы илдән кертелгәнен әйтеп тормыйм, өч мәртәбәдән аңлагыз. Күпме металл чыгарабыз, ә илебездә, хәтта, кадак та җитештермибез.

Федерация Советы рәисе кече һәм урта бизнесны кадак җитештерүгә җәлеп итәргә чакырды. 
— Үзебез дә эшли алган эшләрне башкармавыбызга кечкенә генә мисал бу. Аңлашыла, бер ил дә бөтенесен дә җитештерми. Ләкин, хәзер мускулларны ныгытырга һәм алга тизрәк барырга кирәк,-ди Валентина Матвиенко. Кече һәм урта бизнес илебезне тиз арада кадак белән тутырачагына өметләнә җитәкче.

Шушы уңайдан бер вакыйга искә төште. “Татарстан Республикасының дәүләт заказлары буенча агентлыгы” генераль директоры Яков Геллер әле 5 ел элек үк республикада кадак җитештерелмәвен борчылып әйткән иде. Татарстанның икътисад мәсьәләләрен алданрак кайгыртуына үзенә күрә тагын бер дәлил бу.
— Республикада заводлар санап бетергесез бит. Нигә кадак ясамыйбыз соң без?- дип сорау биргән идем.
— Халыкара базарда товарлар инде үз өлешләрен биләп алган. Бер үк товарны җитештерү отышлы түгел,- дип җавап биргән иде Яков Геллер. 
 Ул вакытта, бәлки, шулай булгандыр. Бүген халыкара вазгыять үзгәрде. “Башыңа төшсә, башмакчы булырсың”, дигән әйтем бар татарда. Башмакчы да, электрончы да, фармацевт та, тукымалар тукучы да, азык-төлек продукциясе җитештерүче дә, станоклар ясаучы да булырга кирәк безгә хәзер. Россия халкы -тырыш һәм талантлы халык. Белоруссия Республикасы Президенты Александр Лукашенко сүзләрен кулланып әйтсәк, без әле Европага үзебезне күрсәтербез.