Рөстәм Миңнеханов Казанда Яшь дипломатларның V глобаль форумы ачылышында катнашты

Форум Казанда беренче тапкыр уза. 26 августтан 30 августка кадәр дөньяның 42 иленнән килгән тышкы сәяси ведомстволарның 120 яшь хезмәткәре түбәндәге мәсьәләләр буенча фикер алышачак: хәзерге шартларда дипломатиянең трендлары һәм таләпләре, цифрлаштыру, халыкара мөнәсәбәтләрдә мәгълүмати һәм кибербериминлек, горизонталь дипломатия һәм интеграцион берләшмәләрнең киләчәге.

Рөстәм Миңнеханов искә төшергәнчә, Казан ИХО яшьләр башкаласы статусында яшь дипломатларның Глобаль форумын кабул итә. Бу көннәрдә шәһәрдә Казан Глобаль яшьләр саммиты эшли башлый, аның эшендә күп кенә яшь дипломатлар да катнашачак.

ТР Президенты ассызыклаганча, Казанның мондый чараларны оештыру буенча тәҗрибәсе зур. 2016 елдан биредә даими рәвештә ИХО илләренең Яшь дипломатлары форумы уза. 2020 елда Татарстан башкаласы БРИКС илләренең Яшь дипломатлары форумын кабул итте. «Бу уңай тәҗрибә безнең мәйданчыкта мондый төрдәге конференцияләр уздыру өчен яхшы ярдәм булыр дип өметләнәм», - диде Рөстәм Миңнеханов.

Ул билгеләп үткәнчә, соңгы елларда Татарстанның дөнья илләре дипломатик вәкилләре белән хезмәттәшлеге географиясе һәм форматы киңәйде. Казан дипломатик клубы булдырылды һәм уңышлы эшләп килә, ул Казанда урнашкан барлык чит ил вәкиллекләрен берләштерә. Моннан тыш, ИХО илләре форумнарында катнашучы дипломатларның «Татарстан дуслары» дипломатик клубына керүе традициясе бар.

«Бүгенге катлаулы шартларга карамастан, бүген залда дөньяның күп кенә илләренең тышкы сәяси ведомстволарыннан делегатлар җыелды. Бу – булачак дискуссияләрдә кызыксыну уятуның, үзара ихтирамлы диалогка һәм уртак бәйләнеш нокталарын эзләүнең ачык дәлиле. Уртак эшкә чакырылган экспертларның: федераль һәм төбәк хакимияте органнары, академик даирәләр, эшкуарлык җәмәгатьчелеге һәм киң җәмәгатьчелек вәкилләренең катнашуы да үз өлешен кертергә тиеш», - дип билгеләп үтте Рөстәм Миңнеханов.

Татарстан Президенты фикеренчә, халыкара мөнәсәбәтләрнең киләчәге өчен җаваплылык күп очракта дипломатлар җилкәсенә төшә. Үз чиратында, эшнең уңышлы нәтиҗәләре гомуми әзерлеккә, билгеләнгән элемтәләргә һәм үзара файдалы шартлар эзләүгә бәйле. «Бу контекстта сезнең һөнәри үсешегез, «горизонталь дипломатия» концепциясенә таяна торган мондый диалог мәйданчыклары әһәмиятен бәяләп бетерү кыен. Яшь дипломатларның бишенче глобаль форумы традицион конструктив рәвештә узар, файдалы элемтәләр урнаштыруга һәм яңа иҗади инициативалар эшләүгә ярдәм итәр дип ышанам», - дип өстәде Рөстәм Миңнеханов.

Үзенең видео мөрәҗәгатендә Россия Тышкы эшләр министры Сергей Лавров форумның бай программасын һәм аның илләр арасында дустанә мөнәсәбәтләрне үстерүгә керткән өлешен билгеләп үтте. «Сезнең очрашу халыкара аренада ышаныч һәм үзара аңлашу атмосферасын саклау буенча уртак эшкә зур өлеш кертә. Ул яшь дипломатларның, хакимият вәкилләренең һәм экспертларның формаль булмаган аралашу мәйданчыклары челтәрен үстерүгә юнәлдерелгән «горизонталь дипломатия» концепциясенә таяна», - дип өстәде тышкы сәяси ведомство башлыгы.

Видеоэлемтә буенча форумда катнашучыларга сәламләү сүзләре белән Дәүләт Думасының Халыкара эшләр буенча комитеты рәисе Леонид Слуцкий һәм Россотрудничество җитәкчесе Евгений Примаков мөрәҗәгать иттеләр.

Белешмә өчен:

Яшь дипломатларның Глобаль форумы – бөтен дөньядан тышкы сәяси ведомстволарның яшь хезмәткәрләре өчен уникаль дискуссия мәйданчыгы, анда халыкара бергәлек алдында торган актуаль проблемалар, хезмәттәшлек өчен потенциаль мөмкинлекләр турында фикер алышалар.

ТР Президенты Матбугат хезмәте