Авылга кайт, миллионер булырсың

Авылга кайтып эшләргә ризалык биргән яшь белгечләргә 1 миллион 100 мең сум күләмендә акча түләячәкләр. Бу турыда ТР сәламәтлек саклау министры Айрат Фәррахов хәбәр итә. Аның сүзләренчә, бу акчалар 35 яшькәчә булган, авыл җирендә 5 ел эшләргә ризалык биргән яшь табибларга биреләчәк. 1 миллион сум федераль бюджеттан бүленеп бирелсә, 100 мең сум республика тарафыннан түләнәчәк.
Авылга эшләргә кайткан яшь табиб, куелган шартларны үтәмәгән очракта, әйтик, ул авылда 5 елдан азрак эшләсә, түләнгән әлеге акчаларны кире кайтарырга тиеш була.
Министр әйткәнчә, бүгенге көндә Татарстан авылларында эшләү өчен 80 табиб кирәк.