Башкаланың суы эчәргә яраклы

«Эшлекле дүшәмбе» киңәшмәсендә шәһәрнең баш санитар табибы Алмас Имамов чыгышында әйтелгәнчә, күрелгән чаралар су составының яхшыруына китергән. «Водоканал» лабораториясе тикшерүләре раслаганча, эчәр суның санитар-химик күрсәткечендә стандартларга туры килмәүче күләм узган ел 6,1 процентны тәшкил иткән. 2010 елда ул 10,1 процент булган.
«Казан халкы иминлек таләпләренә җавап бирүче су белән тәэмин ителә. Су елына 3-4,5 мең мәртәбә тикшереп торыла», - дип белдерде Алмас Имамов.
Узган ел башкаладагы һава 16,1 мең тапкыр тикшерелгән, 502 очракта гына һавада зарарлы матдәләр тупланмасының тиешле нормалардан артып китүе беленгән. Быелның 8 аенда 337,9 тонна азык-төлеккә «сыйфатсыз» тамгасы сугылып, сатуга чыгарттырылмаган. Республикада быел терлекләрдә һәм җәнлекләрдә котыру авыруының 211 очрагы теркәлгән. Бу узган елның шул чорындагыдан 2,5 мәртәбәгә күбрәк. Казанда узган ел шундый 4 очрак теркәлгән булса, быелның июль-август айларында төлкеләрдә котыру авыруының 2 очрагы күзәтелгән. Мондый хәл Совет районындагы Чебакса һәм Идел буе районының Старое Победилово авылларында булды.