Беренчегә – беренче тапкыр

_{Узган елда Татарстанда 36148 бала беренче сыйныфка укырга кергән, быел исә 39 958 бала беренче тапкыр мәктәпкә бара.
Фото: Фәрит Моратов, «Шәһри Казан» архивыннан.}

Яңа уку елына багышланган Белем көне һәм тантаналы линейка гадәттәгечә 1 сентябрь көнне узачак. Бүген ата‑ана балаларының китап-дәфтәрләрен барласа, мәктәпләр гөр килеп укучыларны кабул итәргә әзерләнә.

Быел Казан мәктәпләрендә 11222 бала тәүге тапкыр парта артына утырачак. Беренче сыйныфка барган барлык укучыларга да Казан мэриясе бүләккә «Балалар әлифбасы» тапшырачак.
Уку елы шатлыклы яңалыкларга бай. Шуларның берсе - республикада беренче сентябрьдән Аксубай, Азнакай, Балтач, Буа, Чүпрәле, Лаеш, Теләче муниципаль районнарында җиде яңа мәктәп һәм 16 балалар бакчасы ачылу. Аларның сигезе - авыл җирлегендә эшли башлый.
Уку елының беренче ярты еллыгында Татарстанның 52 мәктәбендә 5нче сыйныфлар өчен «Биология» һәм 8нче сыйныфлар өчен «Химия» мультимедиа әсбаплары кертеләчәк. Сынау проектында катнашучылар уку елы дәвамында мультимедиа-ярдәмлекләрне кулланып карарга һәм проектка үз тәкъдимнәрен кертергә тиеш булалар.
Шулай ук көзнең беренче көннәрендә Казанның Шиһабетдин Мәрҗани исемендәге 2нче номерлы татар гимназиясе базасында Республика Милли мәгариф үзәге ачылачак.
Беренче сентябрьдән башлап укучыларны юл йөрү кагыйдәләре белән таныштыра башлаячаклар. ЮХИДИ хезмәткәрләре мәктәпләрдә шәһәрдә юл йөрү хәрәкәте куркынычсызлыгы буенча тематик спектакльләр куячак. Балаларга «Яшь җәяүле дәфтәре» бүләк итәчәкләр. Аның ярдәмендә укучылар уен формасында юл кагыйдәләрен өйрәнә ала.
«Балалар - тормыш чәчәкләре» акциясе кысаларында Белем бәйрәме көнне ЮХИДИ хезмәткәрләре юл кырыенда урнашкан мәктәпләр янындагы юлларда машина йөртүчеләргә чәчәкләр таратачак. Бу машина йөртүчеләргә уку елы башланганын искә төшерүнең, алга таба игътибарлырак булырга кирәкне кисәтүнең бер юлы, ди оештыручылар.
Бу көн балаларның хәтеренә уелып калсын өчен, 2 сентябрь көнне Казанның барлык мәктәпләрендә дә беренче сыйныфка укырга кергән балаларны фотога төшерәчәкләр. Фотосурәтләрне 6 сентябрь көнне 13.00 сәгатьтә «Кырлай» паркында Беренче сыйныф укучылары аллеясе ачылу тантанасында карап булачак. Бәйрәм көнне сабыйларны элемтәче, полиция хезмәткәре, табиб, хәрби, коткаручы, кинолог кебек һөнәрләр белән таныштырачаклар. Бәлки укучылар монда үзләре хыялланган һөнәрне табып, аны тормыш мәгънәсенә әйләндерер.

Чыгарылыш укучылары киләсе елдан башлап Бердәм дәүләт имтиханнарын яңача тапшыра башлаячак. 2015 елдан рус теле буенча имтихан биремнәреннән әзер җавап вариантларыннан торган биремнәрне бетереп, аның урынына сочинение язарга туры киләчәк. Бу баланың БДИ тапшырырга әзерме, түгелме икәнлеген билгеләүче һәм укучыны имтиханга кертү, кертмәүне билгеләүче фактор булачак.