Казан Сабан туе дүрт мәйданчыкта гөрләячәк: анда махсус автобуслар җибәрелә

Казан Сабан туе милли көрәштә җиңүчеләре автомобиль һәм тәкә белән бүләкләнәчәк.

"Бәйрәм кунаклары милли уеннарда үз көчләрен сынап карый һәм милли көрәштә Татарстанның иң яхшы батырлары ярышын күзәтә алачак. Турнирның абсолют чемпионнары төп приз - тәкә һәм автомобиль алачак», - диелә хәбәрдә.

Казанда дүрт Сабан туе мәйданына өстәмә автобуслар, шаттллар һәм электричка йөриячәк. Бу хакта Башкарма комитетта узган эшлекле дүшәмбедә Мәдәният идарәсе җитәкчесе Азат Авзалов сөйләде.

“Бәйрәм чараларын карарга бару өчен казанлыларга һәм шәһәр кунакларына җәмәгать транспортыннан файдаланырга киңәш итәбез. Сабан туе көнендә транспорт хезмәте махсус система буенча оештырылачак”, - диде Авзалов.

Мирный бистәсендәге Каенлык мәйданына “Җиңү проспекты” метро станциясе, "10 нчы микрорайон”, Павлюхин урамындагы “Филармония концерт залы” һәм Глазунов урамындагы “Теплоконотроль" тукталышларыннан махсус автобусларда барып булачак.

Әлеге маршрутлар буенча 60 автобус чыгачак. Алар иртәнге сәгать 8 дән, барлык кунакларны таратып бетергәнче эшләячәк. Юл бәясе шәһәр тарифы буенча – 27 сум булачак. Моннан тыш, Мирный Сабан туена “Казан 1” станциясеннән электропоездда килергә була. Монда юл бәясе арзанрак - 22 сум булачак.

Аккош күле урманындагы Сабантуй мәйданына 36, 46 һәм 72 нче рейс автобусларында барырга мөмкин. Бу маршрутларга өстәмә 72 состав чыгачак. Алар кунакларны Залсеный бистәсендәге “Ремплер” тукталышына кадәр илтәчәк. Ә ул урыннан Сабан туе мәйданына кадәр һәр биш минут саен бушлай сигез шаттл йөриячәк.

Ун ел эчендә беренче тапкыр Дәрвишләр бистәсенең каен урамында да Сабан туе узачак. Анда “Халитов урамы” тукталышыннан бушлай шаттлда барырга мөмкин булачак. Моннан тыш, бәйрәмгә 1, 19, 25, 34, 60, 84, 91 нче маршрут автобусларында да барып була. Ул көнне аларга өстәмә буларак 89 машина чыгачак.

Казан ипподромында ат чабышы вакытында (13.30) 3 нче номерлы троллейбусның эшен көчәйтәчәкләр. “Җиңү проспекты” метро станциясе тукталышыннан ипподром аркылы Горький паркына кадәр өстәмә шаттл җибәрәчәкләр.

Татар-инфором