Рөстәм Миңнеханов: «Безнең эшебездә хатын-кыз роле гаять мөһим»

Кем белән эшләргә җайлырак - хатын-кызлар беләнме, әллә ир-атлар беләнме дигән сорауга җавап биреп, Рөстәм Миңнеханов Татарстан Президентының хатын-кыз ярдәмчеләре эшенә бәя бирде.

- Безнең эшебездә хатын-кыз роле гаять мөһим. Теләсә кем башлык була ала, ә менә нинди дә булса эшне башкару өчен белгечләр кирәк. Бездә Олеся Балтусова тарихи үзәк өчен җаваплы. Ләйлә Фазлыева социаль өлкәдә зур тәҗрибәгә ия. Наталия Фишман - эшебезгә күп кенә кызыклы нәрсәләр керткән бик креатив кыз, - диде.

Рөстәм Миңнеханов шаярып билгеләп үткәнчә, аңа хатын-кызлар белән эшләве җайлырак, алар пөхтәрәк тә, җыйнаграк та. Шул ук вакытта сөйкемле һәм чибәр булу - белегечләрне сайлап алганда төп күрсәткеч түгел.

Россия Президенты Владимир Путинның 12 февральдә Татарстанга эшлекле сәфәр кылуы турындагы сорауга Рөстәм Миңнеханов белдергәнчә, бар да әйбәт һәм лаек төстә узды.

- Президент күңеле ятмаган җиргә бармый... Безнеңчә, бу күренеш республикабызга зур ышанычны белдерә. Моның кадерен белергә кирәк, - диде ул.

Рөстәм Миңнеханов Чечня башлыгы вазыйфасыннан Рамзан Кадыйровның китү мөмкинлеге буенча да үз фикерен җиткерде.

- Бу Чечня һәм тулаем Россия өчен дә зур югалтү булачак, - диде Татарстан Президенты. - Без аның белән сөйләшеп алдык һәм мин аңа: «Син эшләргә тиеш!» - дидем.

Республика өчен кискен тема - яшь ярымлык балаларны бакчалар белән тәэмин итү мәсьәләсе дә кузгатылды. Рөстәм Миңнеханов сүзләренчә, бүген бу - илебез өчен глобаль проблема. Татарстанда бик күп балалар бакчалары төзелә: 2015 елда - 75, 2014 елда - 56.

- 1,5 яшьлек балаларны бакчалар белән тәэмин итәрлек мөмкинлек юк әле, - диде ул. - Мондый бюджет кытлыгында бу йөкләмәләрне алу мөмкин түгел.

Сорауларның берсе «Рубин» белән «Ак Барс» клубларының кадрлар сәясәте турында иде.

- Минемчә, без үз командаларыбызны яратырга тиеш, - дип белдерде Рөстәм Миңнеханов. - Хәтта соңгы урынны алсалар да! Бер мәртәбә оттырганнар икән - алар начар дигән сүзмени? Уенчыларның да хәленә керергә кирәк. Командаларыбыз өчен җан атарга өндим - икенче лигада уйныйлармы, премьер-лигадамы. Бигрәк тә, легионерларны түгел, үз уенчыларыбызны тәрбияләү турында сүз алып барган заманда. Ышанам ки, «Ак Барс»ның да, «Рубин»ның да потенциалы җитәрлек, - диде Рөстәм Миңнеханов.

Татарстан Президенты хатын-кыз журналистларга яхшы кәеф, көләч көннәр һәм күп бүләкләр теләде. Әни булырга җыенганнарга уңышлар теләп, бер бала белән генә чикләнеп калмаска өндәде, дип хәбәр итә ТР Президенты матбугат хезмәте.