Рөстәм Миңнеханов: «Социаль программалар киләсе елда да эшләячәк»

Программаларның шактый өлеше нәкъ менә районнар үсешен күздә тота. Шул рәвешле, авылларда яшәү сыйфаты арта, районнар матурлана, үсә, яңара.

Татарстан Президенты күрсәтмәсе нигезендә, бу программалар илдәге икътисади кризис шартларында да туктатылмый килде. 2017 елда да әлеге программалар эшләвен дәвам итәчәк, дип белдерде Рөстәм Миңнеханов. Соңгы елларда Татарстан социаль өлкәгә миллиардлаган акча кертте. Әлеге эшләрнең төп максаты - республикада яшәү шартларын яхшырту, авылларда да, шәһәрләрдә дә халык өчен уңайлы мөмкинлекләр булдыру. 2015 елда парк һәм скверларны төзекләндерү программасы үз эшен башлап җибәрде, бу ел - Су саклагыч зоналар елы дип игълан ителде. Нәтиҗәдә, барлык 45 районда да ял итү урыннарының күбесе төзекләндерелде, яңа парклар, Европа дәрәҗәсендәге комлыклар да барлыкка килде.

Социаль программалар эшләү нәтиҗәсендә, шактый тәҗрибә тупланган, яңа алымнар да туган. Рөстәм Миңнеханов кушуы буенча, Икътисад министрлыгы социаль программаларны финанслау концепциясен эшләгән. Анда шәхси капиталны җәлеп итү дә күздә тотыла. Венчур фонды базасында мөһим сорауларны оператив рәвештә чишә торган махсус республика фонды оешачак. Әлеге фондка Татарстан хакимияте җитәкчеләре генә түгел, эшмәкәрләр, инциатив төркемнәр дә керәчәк. Өстәмә акчалар социаль программаларның нәтиҗәлелеген арттырырга, халыкны борчыган күбрәк сорауларны чишәргә ярдәм итәр дип ниятләнелә.

^{Фото: m.prokazan.ru}