Балтачта “Шүрәле: Кырлай кайтавазы” тамашасы Тукай рухын яңартты

13 апрель көнне район үзәгенә килгән ансамбль язгы рух, милли сәнгать һәм Тукай мирасы аша тамашачыларга онытылмас кич бүләк итте.

Салкын һәм кояшсыз көн булуга карамастан, мәдәният үзәге эчендә чын мәгънәсендә җылылык хөкем сөрде. Зал тулы тамашачы, бигрәк тә югары сыйныф укучылары, сәхнәдәге һәр хәрәкәтне зур кызыксыну белән күзәтте.

Бөек шагыйрь Габдулла Тукайның тууына 140 ел тулу уңаеннан әзерләнгән әлеге спектакль Тукайның “Шүрәле” әкиятенә һәм Фәрит Яруллинның классик балетына нигезләнгән иҗади оммаж буларак тәкъдим ителде. Постановкада Леонид Якобсон салган классик традицияләр сакланып, милли биюләр һәм татар халык җырлары белән баетылган яңа сәхнә версиясе тудырылган.

 Яңа сюжет сызыклары һәм милли колорит

Спектакльдә таныш сюжет киңәйтелеп, вакыйгаларга яңа персонаж – Сөембикә кертелә. Анда Шүрәле, Былтыр һәм Сөембикә катнашындагы вакыйгалар аша мәхәббәт, батырлык һәм явызлыкка каршы көрәш темалары ачыла.

Тамаша барышында “Сандугач”, “Кара урман”, киң халыкка билгеле “Алмагачлары” кебек җырлар яңгырады. Шулай ук сирәгрәк башкарыла торган “Мөгълифә” җыры да тамашачыга тәкъдим ителде. Ахырда ике хор башкаруында яңгыраган “Алмагачлары” залда аеруча җылы кабул ителде.

Тамашачы һәм рәсми бәя

Премьерага килгән Балтач районы башкарма комитеты җитәкчесе урынбасары Илһам Гайнетдинов спектакльнең әһәмиятен билгеләп үтте:

“Татар мәдәниятен, моңын һәм биюен танытучы дәүләт ансамбле – безнең милли брендыбыз. Балаларыбыз телебезне, мәдәниятебезне саклауда төп дәвамчылар булырга тиеш”, – диде ул.

Ансамбльнең сәнгать җитәкчесе Айрат Хәмитов исә спектакльнең идеясе һәм әзерлек процессы турында сөйләде. Аның сүзләренчә, яңа постановка классик нигезне саклап, заманча вокаль һәм хореографик элементлар белән баетылган.

 Рольләр һәм иҗатчылар

Спектакльдә Шүрәле ролен – Айнур Фәизов, Сөембикәне – Айгөл Кыямова, Былтырны – Айрат Заһидуллин башкарды. Шулай ук ансамбльнең танылган солистлары һәм хореография төркеме катнашты.

 Киләчәктә гастрольләр көтелә

“Шүрәле: Кырлай кайтавазы” спектакле тиздән Татарстан районнары буйлап гастрольләргә чыгачак. Казан тамашачысы исә премьераны 2026 елның көзендә күрә алачак.

Таңсылу Мостафина