Татарстанда 132 меңнән артык бурычлы кеше чит илгә чыга алмый

Бу максаттан май бәйрәмнәре алдыннан махсус “Үз бурычларың турында бел” дип исемләнгән акция дә оештырдылар. Сәүдә үзәкләрендә, социаль яклау бүлекләрендә, урамнарда белгечләр гражданнарга бурычлар хакында мәгълүмат белергә ярдәм иткән чыганаклардан файдалану турында сөйләделәр. Бурычларны кесә телефоннарына урнаштырылган кушымталар аша да белергә була икәнне аңлаттылар.

“Еш кына бурычың бар икәнен белми дә каласың, йә салымың түләнмәгән була, йә юл кагыйдәләрен бозган өчен штраф барлыгы ачыклана.  Бу чара ярдәмендә бурычларны барысын да бер урында тикшертергә була икәненә төшендем”, – ди акциядә катнашучы Лилия Гарифуллина.
Татарстан суд приставлары матбугат үзәгенең җитәкчесе Лилия Хәлимова әйтүенчә, ел башыннан бирле бурычларны тикшерү буенча Татарстан суд приставлары рәсми сайтыннан 270 мең кеше файдаланган. Халык аеруча ЮХИДИ штрафлары, салым, кредит буенча бурычлар юкмы дип кызыксына.

Суд приставларының рәсми сайтында ( http://r16.fssprus.ru) «Башкарма эшләр банкы» сервисына кереп исем, фамилия, отчество, туган елны кертергә кирәк. Әгәр бурыч булса, кеше турында мәгълүмат, бурыч суммасы, документның номеры –  барысы да экранга чыга.
 
Кешенең кредит, коммуналь хезмәтләр кебек социаль түләүләр буенча бурычы 30 мең сумнан артканда, алимент буенча бурычы 10 мең сумнан артканда чит илгә чыга алмый. Бурычлар турындагы мәгълүматны суд приставларының рәсми сайтыннан карарга була. Шулай ук махсус мобиль кушымта да бу хакта мәгълүмат белергә мөмкинлек бирә. Бурычны банк терминаллары, банкоматлар, онлайн-банклар, «Башкарма эшләр банкы» сервисы аша да түләргә була.