Татарстан Республикасы Рәисе Рөстәм Миңнеханов Россия фәне көне белән котлады

Хөрмәтле коллегалар!

Сезне һөнәри бәйрәмегез – Россия фәне көне уңаеннан котлыйм. 
Бәйрәм көннәрендә без Татарстанның фәнни-технологик үсеше елына йомгак ясыйбыз. Гомумән алганда, ул безнең фән һәм мәгариф комплексыбыз өчен күренекле вакыйгаларга бай һәм нәтиҗәле булды. 

Республикада алдынгы  тикшеренүләр уздыру өчен файдаланыла торган инфраструктура һәм яңарышлы мәгариф даирәсе тиз үзгәреш кичереп үсүен дәвам итә. Татарстан Россия Федерациясе субъектларының фәнни-технологик үсеше илкүләм рейтингында беренче өчлектә тоткан урынын саклап калуга иреште, шул рәвешчә, фәнни һәм фәнни-гамәли эшчәнлеккә идарәнең иң яхшы тәҗрибәләренә ия территория булуын раслады. 

2024 ел илебезнең югары белем бирү һәм фән системасы эшчәнлегенең нигезләрен яңача коруга юнәлтелгән җитди гамәлләр белән истәлекле булды. Безгә бергәләп Россиянең яңартылган Фәнни-технологик үсеше стратегиясе үтәлешен, илнең фән һәм техника өлкәсендәге зур уңышлар  вәгъдә итә торган максатларына ирешүне, шулай ук технологияләрдә алдынгылыкның күптән түгел генә кабул ителгән илкүләм проектларын гамәлгә ашыруны тәэмин итәргә кирәк булачак. 

Дәүләтебез һәм җәмгыятебез өчен гаять мөһим әлеге бурычларны хәл итүгә республика галимнәренең зур өлеш кертәчәгенә шигем юк. 

Сезгә республикабызның һәм тулаем илебезнең фәнни-техник алгарышы хакына игелекле хезмәтегездә бәрәкәтле иҗади көч, яңадан-яңа казанышлар, шулай ук нык сәламәтлек һәм иминлек телим. 

Татарстан Республикасы Рәисе Р.Н. Миңнеханов