«“Ашамыйм!” дигән бәлешне төнлә табаклап бетердек»

Яшьлектә калган бер бәлеш кыйссасын язып үтәсе иттем әле.

...1997-1998 нче еллар дип хәтерлим. Казан каласында эшләп йөреп, Красная Позиция урамында, фатирда яшәгән чак. Хәзерге шикелле буш фатир түгел, хуҗабикә, Лаеш районы Атабай авылыннан Алсу исемле кыз һәм мин ятак бүлешкән вакытлар. Фатир хуҗасы Тәскирә апабыз безнең бәхеткә нык яхшы, күп кенә чаялыкларыбызга күз йомып, сүз әйтмичә,  безне матур гына тәрбияләп, сыйлап яшәүче апа булып чыкты. 
 Ул елларда "Пятачок" дип аталган (НКЦ дигән җирне күпләр хәтерлидер) дискотекалар була торган иде. Без дә бер көнне җыенып шунда барырга булдык. Без дигәнебез – Гөлнара, Алсу һәм мин.

Бәйрәм булгандырмы юкмы, анысын анык кына әйтә алмыйм. Шулай да көз, кышка авышып барган чак, чөнки казлар чалып эшкәрткән вакытлар. Тәскирә апабыз каз әгъзалары (тәпи, баш, канат, муен һ.б.) салып, тәмле итеп бәлеш пешергән иде. Без аның тәмлелеген соңыннан гына аңладык. Капкачы ачылып, пары чыгып  торган бәлешкә карап утырдык та, өчебез дә: "Мин мондый бәлеш ашамыйм!" - дип, ач килеш дискотекага чыгып киттек. Анда да нәрсә дә булса капкалаганны хәтерләмим.

Малларны көтүлектә яткылыкка (ялга) куып кертеп, койрыклары белән кигәвеннәрне куган сыман, үкерә-котыра биеп, хәлдән таеп кайтып кердек яшәгән фатирыбызга. Тәскирә апа өйдә түгел, малайларына кунакка киткән, чәй куеп көтеп торучы юк. Әхә, газ плитәсе өстендә без яратмаган бәлеш тора! Җылытып-нитеп тору юк (кая инде ул, төнлә бәлеш җылытып яталар димени?!). Өстәл уртасына утырттык табаны, өч яклап әйләндереп алдык та, керештек бәлеш эчендәге әгьзаларны “өйрәнергә”. Кай җиребезгә сыйдырганбыздыр, 3 кыз, эх тә итмәдек, сөякләрен сөяккә, өлешләрен өлешләргә аерып: "Тәмле булды әле бу!!!"- дип, табаны чистартып та куйдык.  

- Яратмаган бәлеш тә ярап куйган әле үзегезгә, - дип куйды иртән кайтып кергән хуҗабикәбез.
...Шул көннән алып безнең өчен иң тәмле бәлеш булып,  нәкъ менә шушындый  бәлеш тора да инде.

Дулкыния Гаянова.