Егетем биргән букетны чүплеккә аттым. “Нәрсә алырга белмәдем”, – ди үзе

Шундый зарыгып көткән бәйрәм бөтен кәефемне кырды. Әле дә ачуымнан шартлармын сыман.

Беренчедән, йөргән егетем миңа азык-төлек кибетендә шиңеп яткан лалә букеты бүләк итте. Мин аны өйгә алып керүгә, чүплеккә аттым. “Сиңа бүләк аласы килгән иде, нәрсә алырга белмәдем”, – диде. Шаккаткыч! Ала белмәгәч, акчалата яки сертификат биреп булмый идеме?

Ә эштәге егетләр берәр лалә чәчәге бүләк итте һәм пицца белән сыйлады. Миңа эш буенча китәргә туры килгәч, кайтуыма пиццадан җилләр искән иде инде. Теге мескен лалә дә моңаеп башын иеп утыра иде. Гайрәтем чикте. Мин егетләрне 23 февраль белән котларга 1000 сум акча бирдем, ә миңа нәрсә бирделәр? Шулкадәр күңелгә тиде...

Гөлнара Г.