Җир җиләге чистарта торган җайланманы кайчан уйлап чыгаралар?

Зур җиләкнең төбен ала торганы бар барын. Тик аның белән бер табак вак җиләкне чемләп утырып булмый бит инде. Чия төшен ала торган җайланма дисеңме, инде тавык йолкый торган нәрсәне әйтәсеңме, ни генә юк хәзер! Нүжәли җиләк чистарта торган берәр механизм уйлап табарга башлары җитми? Бер мин генә түгелдер бит инде ул җиләк чемләргә яратмаучы? Берәр күңеллерәк сериал карарга куйсаң, чүпләнә инде ул үзе. Әмма бармак башлары ярылып бетә, пычак очы белән алсаң, озак маташкан кебек.

Ә менә җыярга яратам! Кәҗәсеннән бигрәк мәзәге дигәндәй, ул җиләклектәге башларны әйләндерерлек чәчәк исләре дисеңме, тыңлап туймаслык кош тавышларын әйтәсеңме, андагы матурлык, андагы хозурлыкны тасвирлап бетереп булмый. Дөньямны онытып хисләнеп, хыялланып йөрим мин анда. Ә ул быелгы җиләк! Үзе эре, үзе күп. Хет утырып җый, хет ятып, хет үрмәләп йөр. Бер чүгәләп, бер торып йөри торгач, бервакыт гимнастка Светлана Хоркинаның мастер-класс күрсәткәне искә төште.

Аяк мускулларын ныгытыр өчен идәнгә ваклап чүп ташлап чыгарга һәм шуны бер иелеп, бер торып җыеп чыгарга өйрәткән иде. Эх, күрсәтер идем мин аңа бүген мастер-класс! Монда барлык буыннар эшли. Әле ыштаныңны жәлләмәсәң, тез башларына массаж өчен мүкәләп йөрергә дә була.
Иртәгә тагын барам әле. Чурт с ним, чемләргә иренсәм, юып морозилкага булса да атармын җиләген. Җаныма, тәнемә сихәт алып кайтыйм әле. Җиләк вакыты бер генә!

Камәрия Вафина
Кукмара, Ядегәр