Туңдыргычка барын да тыкмагыз!

Сәламәтлек өчен зыянлы булуы бар. Шулай ук туңганда азыкның дымлылыгы бетә һәм тәменә зыян килергә мөмкин. Болай булмасын өчен ризыкны туңдыргычка куйганчы пакетка салып, бик яхшы итеп төрегез.

Туңдырыла торган ризыкны вакламагыз, эре кисәкле килеш катырыгыз. Туң ризыкны ашар алдыннан берәр тәүлек алдан суыткычка алып куегыз һәм шунда эретегез. Әгәр дә өйдә вакуумлы пакетлар бар икән, әлеге ысулны кулланыгыз.

Салатларның барысын да туңдырырга ярамый. Кыяр, помидор, яшел үләннәр кушылганнарны бигрәк тә. Кыяр, салат яфракларын гомумән дә туңдырмыйлар.

Салатларга кушыла торган яшелчәләрдән татлы борычны гына катырырга мөмкин. Оливье кебек салатларны да туңдыралар. Әмма аңа кыяр һәм майонез кушылган булырга тиеш түгел. Шуны да онытмагыз: туңдырып эретелгән мондый салат тәмен югалтачак. Әгәр дә аш пешергәндә шулпагыз артык кала икән, аны формаларга яисә контейнерларга салып, катыра аласыз. Шулпа чиста булсын, яшелчәләр эләкмәсен. Кәбестә шулпасы, борщ, солянка кебек ашларны да туңдыра аласыз. Элеккеге заманда кыш айларында кәбестәне башта мичтә пешергәннәр, аннан туңдырганнар һәм җылытып ашаганнар. Катырып эреткән щи тагын да тәмлерәк булган. Ашны катырырга ниятлисез икән, анда ярмалар булмасын. Аны бер зур савытта катырганчы, порцияләргә бүлеп, кечкенә савытларда туңдыру яхшырак. Эреткәннән соң аш тиз бозылырга мөмкин.

Әгәр дә ашта ит кисәкләре булса, аларны аерым туңдырырга киңәш ителә. Балык ашларын, пюре ашларны катырмыйлар. Эрегәндә аларның структурасы бозыла һәм аш тәмсезләнә.

Айсылу Хәсәнова әзерләде.