Улыма гомердә бер тапкыр ярдәм сорап шалтыраттым, ә ул...

Мин ялгыз яшим, 29 яшьлек улым бар. Беркөнне төн уртасында подъездда кемдер дулап кычкырды, тәрәзәләрне ватты, ишекләргә шакыды, шул исәптән минекен дә дөбердәтте. Хәзерге йортлардагы кебек ватсапта күршеләр төркеме юк бездә, ни булганын кемнән сорарга белмим, әмма бик курыктым.

Әлбәттә, ике дә уйламый улыма шалтыраттым. Ә ул телефонын алмады! Төнлә ни булганы аннары ачыкланды: өске катта яшәүче исерек күрше ишекләрне бутаган. Ишек ачучы булмагач, хатыны өйдә сөяркәсе белән бикләнеп ята дип уйлаган. Шуңа күрә хәленнән килгәнчә кызган.

Иртән улым үзе шалтыратты, аңа чын күңелемнән зарландым, “нишләп телефоныңны алмадың, үтерә яздылар бит”, дидем. Ә ул: “Полициягә шалтыратырга кирәк иде. И вообще, әйбәт күршеләр белән дус булырга кирәк, алар ярдәм итми калмас”, - диде. Шаккаттым! Полициягә шалтыратмаган кая?! Килмиләр алар! Үземне яклаучысыз һәм мескен итеп тойдым. Мин ул баланы таптым, үстердем, киендердем, укыттым.

Ә ул мине хәтта яклый да алмый?! Киленгә дә шалтыраттым, ул тыңлап торды да, дәшмәде. Аның каравы, улым безне ташлап киткән әтисе белән бик яхшы аралаша. Әтисенең машинасы юлда ватылгач та, төнлә торып ярдәмгә чапты. Казаннан 100 чакрым ераклыктагы мунчасын да төзергә булышты. Ә мин гомердә бер тапкыр ярдәм сорап шалтыраттым, ә ул миңа җавап та бирмәде. Күршеләр табырга куша. Нәрсә инде бу?!.

Казаннан Галия ханым

Фото: ru.freepik.com