Хыянәтче ире белән әле дә яши

Тормыштан алынган бер мисал. 

Әлеге гаилә Казандагы микрорайоннарның берсендә яши.  Өч балалары бар. Көннәрдән бер көнне иртән тәмләп йоклап яткан ирнең телефонына смс килеп төшә. Хатыны тавыштан уянып китә дә, иренә сиздермичә генә телефонын актара башлый. Ә анда...ире белән эшләүче хатын эчке киемнән төшкән фотосын җибәргән. "Кадерлем, сине көтәм. Бу киемне әле яңа гына махсус синең өчен алдым. Кич күрешербез", дип язарга да онытмаган. Хатын әлеге язуны скрин төшерә дә, үзенең телефонына күчерә. Шул ук вакытта иренең телефонына килгән әлеге смсканы мессенджерда бер меңгә якын хезмәткәр тупланган чатка җибәргән. Әле:"Кемгә кирәк? Сезне менә шушы матур кыз көтә", дип язып куярга да онытмый. Теге хатынның ире дә шул чатта утыра икән. Иртән мәхәббәт кочагына ташланган ир уянса, телефоны шартлый язган. Сөяркәсе дә, башка хезмәттәшләре дә өем-өем хат язган. Әле шуның белән генә тәмамланмый язышулар. Ирен хыянәттә тоткан хатынга полициядән шалтыраталар: "Сезне бүлектә көтәбез, сәбәбен биредә белерсез", ди хокук сакчылары. Озын сүзнең кыскасы, иренең сөяркәсенең тормыш иптәше шул хатынга карата шикаять язган. "Язышу, телефон сөйләшүләре, почта, телеграф яки башка хәбәрләр серен бозган өчен җинаять җаваплылыгы" маддәсе буенча җинаять эше кузгатылган икән. Берничә тапкыр суд утырышыннан соң, ире хыянәт иткән хатынга 35 мең сум күләмендә штраф түләргә ясаганнар. Ә ире белән һаман да яши ул, өч бала белән кая барыйм, ди. Теге хыянәтче хатын да үз ире кочагында. 

Аңламассың боларны. Кызган чакта хәлләр майтарып ташладылар да, ә мәгънәсе генә булмады. Ике хыянәтченең әле дә очрашулары турында кайчак ишетелгәли икән. 

Казаннан Гөлназ
Фото: ru.freepik.com