Агулы үрмәкүчләр үрчи

Татарстан шәһәрләрендә куркыныч бөҗәкләр - агулы үрмәкүчләр күренә башлаган. Аерым алганда, Чаллы шәһәрендә - тарантул, ә Казанның Киндери бистәсендәге бер шәхси йортта аргиопа дип аталган үрмәкүч гаиләсен тапканнар. Чаллыда тотылган бөҗәкне санэпидемстанциягә алып барганнан соң, аның агулы тарантул үрмәкүче икәнлеген әйткәннәр. Ул кешене шөпшә чаккан кебек тешли, зарарланган урын шешә, кычыта икән. Сәер бөҗәкләрнең барлыкка килүен арахнологлар климат җылынуы һәм кышларның җылы килүе белән аңлаталар. Бәхеткә, үрмәкүчләр тешләүдән зыян күргән кешеләр турында мәгълүматлар юк.