Америкада... татарча бәби чәе

Сурайа ханым минем шигырьләрне дә русчага тәрҗемә итеп, укучыларымны арттырган кеше. Татарстанның Актаныш районында туып, Казанда үсеп, Мәскәү университетын тәмамлап, Америкада биофизика өлкәсендә хезмәт куйган галимә. Аның белән һәр аралашу ниндидер дөнья ачуга тиң. Электрон почта, ватсап араларыбызны якынайтыр өчен бик тырыша. Телефон аша Нью-Йорктан Сурайя ханымның ягымлы тавышы килеп ирешсә, күңелемдә бер тантана тоям, чөнки туган телемнең шундый еракта - океан артында да яңгыравына сөенәм. Моны Сурайя апа үзе дә белә. Әле менә күптән түгел генә шалтыратты да, үзебезнең йолаларга туры китереп, Бәби ашы илтергә җыенуын әйтте. Милләттәшебез Роза апаның беренче оныгы туган икән. Малай! Роза ханым Идиатулина да танышым. Америка белән Татарстан арасын якынайтып йөрүче бу ханым турында язганым бар иде. Лаеклы ялда булып, яше барса да, ара ерак дип тормый инде ана кеше, кызы Америкада яшәгәч, җыена да юлга кузгала. Кышны анда чыгып, яз башында Казанга кайткан иде, июль керер алдыннан тагын Америкага очты. Кызы Эльмира беренче бәбиен алып кайтырга җыена. Менә шул оныкка дәү әни булырга дип китте ул бу юлы. Эльмира Казан кызы, башкалада ике мәктәпне (инглиз һәм музыка) «бишле» билгеләренә генә тәмамлап, югары уку йортында кызыл диплом алгач, Америкага эшкә киткән. Филадельфиядә белем алып, хәзер Нью-Йоркның Манхеттенында атаклы рестораннар челтәрендә директор урынбасары булып эшли.

- Кызымны бик яраталар, - ди ана, горурланып. - Польша егете гашыйк та булды әнә. Кияү поляк. Кем белә, бәлкем тамырларында татар каны да агадыр, Польшада татарлар шактый бит. Көй-моңнарыбыз да күңеленә бик ошый.