Илләр тыныч булса иде

Вакыт аяусыз, шул елларның җанлы шаһитлары бетүгә таба бара. Тулы бер буын китә, ә хәтер яши.  Кемнәрдер җиңү яулаучы ватандашларыбызны искә алыр өчен бәйрәмдә обелиск янына да чыкмаганда, кайберәүләр башкалар аңламаслык  гамәлләр дә кылалар. Шундыйларның берсе Чүпрәле районында туып үскән, бүгенге көндә Тәтеш районында гомер кичерүче Әнүзә апа Сафиуллина. Сугыш турында сүз кузгалса җаннары актарыла аның, чөнки әтисе - сугыш ветераны Хәлим абзый мәхшәрнең уртасында кайнап, чак исән калган кеше. 

Әнүзә апа Кечалан дип аталган тау битләренең ташландык булуына озак еллар борчылып яшәгән. Фермада эшләгәндә, балалар үстергәндә вакыт җитмәгән, әлбәттә. 

Җиңүнең 70 еллыгы бәйрәм ителгән язда ул гаиләсе, урамдашлары ярдәмендә тау битенә агачлар утыртырга карар кыла һәм ул хыялын тормышка да ашыра. Әле утырту гына аз, аларны тәрбияләп тә торырга кирәк бит. Өмәләр , шул өмәләрдә самавырлар кайнатып, ә кайчак үзе генә дә, нәни үсентеләрне тәрбияли. Бүген инде наратлар яхшы ук үсеп киләләр, миләшләр чәчкәгә бөреләнгәннәр. Быел  Әнүзә апа күңелендә йөргән тагын бер хыялын да тормышка ашырды: Хәтер бакчасына баннер да ясатып куйды. Сугышның утында кайнаган, тылда хезмәт иткән, балачакларын сугыш уты көйдергән илдәшләребез истәлегенә куелды ул. Булганнан бар да була диләр бит, намуслы хезмәте белән Татарстан Республикасының атказанган терлекчесе исеменә лаек булган авылдашыбызның уенда йөрткән тагын изге гамәлләре бар әле. Аллаһы тәгалә аларны ашырырга мөмкинлек бирсә иде. “Илләр тыныч булса иде, сугышлар тукталса иде”, - дип тели Әнүзә апа. Ә без үз чиратыбызда аның гаиләсенә иминлек, Кашшаф абый белән икесенә матур картлык телибез. 

... Кечәлан тау битеннән төшкәч борылып карадым: Хәтер бакчасы дигән язу үткәннәрне онытмаска өндәп тора, миләшләрнең яфраклары безгә тыныч тормыш бүләк итүчеләргә зикер әйтә , ә мәңге яшь наратлар гүя хәтерләрдә генә калган япь-яшь көе ил иминлеге өчен башларын салган яугирләр...

Гөлчәчәк Галимова, Тәтеш, Келәш авылы