Кредит картасы: банклар хәйләсенә килеп капмагыз

Кредит лимиты
Бу банкның сезгә куллануга күпме акча биреп торырга әзер булу. Лимит һәр кешенең акчаны кире кайтару мөмкинлегеннән чыгып, индивидуаль билгеләнә. Керемегез күбрәк булган саен лимит та зуррак була. Әмма лимитның зур булуы һәрвакытта да карта хуҗасы файдасына түгел. Чөнки чыгымнарны “контрольдән” ычкынып, бурычка батырга мөмкин. Мондый хәл булмасын өчен чыгымнарны һәрдаим тикшереп торырга һәм бурычны вакытында кайтарырга киңәш ителә.

Процент ставкасы
Банк тарафыннан бирелгән акчаны кулланган өчен кайтарыла торган сумма – процент ставкасы дип атала. Билгеле булганча, кредит карталарыннан куллану процентлары кулланучы кредиты яисә максатчан кредитныкыннан югарырак. Моны уңайлы шартлар өчен түләү дип кабул итәргә дә мөмкин, чөнки кредит картасы һәрвакыт кул астында бит.

Процент ставкасы түбәнрәк булган саен, кулланучыга файдага гына кебек. Әмма һәрвакытта да түгел. Гадәттә андый карталарны ясату һәм хезмәт күрсәткән өчен түләүләр күпкә югарырак була. Шуңа да картадан кулланыр алдыннан бу пунктка игътибар итәргә кирәк.

Процентсыз вакыт
Кредит карталарының бу иң “тәмле” өлеше дияргә була. Кредит карталарыннан кулланылган акча өчен банк күпмедер вакыт процентлар алмый. Ягъни, сез кибеттән берәр техника сатып алдыгыз һәм кредит картасы белән түләдегез, ди. Акчаны исә берничә ай дәвамында кайтарырга мөмкин булачак. Гадәттә, ташламалы период 50-60 көн була. Кайбер банклар 100-120 көнгә кадәр процент алмый.
Әмма ташламалы период беткәннән соң акчаны кайтарырга өлгермисез икән, зур процентлар түләргә әзер булыгыз.
Ташламалы период вакытында да банк минималь түләүләр таләп итәргә мөмкин. Әгәр дә клиент үзенең ышанычлы икәнен күрсәтсә, ул түләүләр киләчәктә алынмый.

Комиссия һәм башка төрле түләүләр
Процентлардан тыш банк тагын башка хезмәтләр өчен дә акча алырга мөмкин. Мисалга, карта буенча күрсәтелгән хезмәт өчен. Дебет карталары өчен түләгән кебек, кредит карталарына да елга бер тапкыр хезмәт күрсәткән өчен акча түләргә туры киләчәк. Кайбер банкларда ул берничә йөз булса, икенчеләрендә берничә мең сумга кадәр җитә.

Картадан акчаны “чыгарып” алган очракта да комиссия түләргә туры киләчәк. Кибеттә карта белән түләгәндә банкка кибет эквайринг, ягъни купюра белән түләмәгән өчен акча түли. Ә кәгазь яисә тимер акча биргәндә банкка файда килмәячәк. Шуңа да кредит карталарыннан акча салдырган өчен финанс оешмалары комиссия ала да инде.

Кредит картасыннан акчаны башка счетка күчергән очракта да өстәмә түләүләр каралган.

Бонуслар һәм лояльлек программалары
Хәзер банклар һәм кредит карталары шул кадәр күп ки, көндәшлек зур булганга клиентларны үзләренә җәлеп итәр өчен финанс оешмаларына төрле программалар уйлап табарга туры килә.

Шуларның берсе – кэшбек. Кредит картасы белән түләгәннән соң сумманың бик аз өлеше булса да кире кайта. Гадәттә банклар билгеле бер товарлар өчен кэшбек тәкъдим итә. Мисалга, авибиалетлар, кунакханәләр яисә ягулык станцияләрендә бензин өчен.
Шулай ук партнер кибетләрдән товар алганда да кэшбек программасы гамәлдә булырга мөмкин. Банклар кайбер кибетләр белән моның өчен килешү төзи.

Нәтиҗә
Йомгаклап шуны әйтергә була: кредит картасы алырга һәм аңардан кулланырга ниятлисез икән, банк тәкъдим иткән барлык шартларны да яхшылап өйрәнергә кирәк. Банк процентсыз вакыт аралыгын зур ясап, процентларны да югары итәргә мөмкин. Икенче банка акчаны тиз арада кайтарырга кирәк булуга карамастан, процент ставкалары түбән булуы ихтимал. Моннан тыш башка төрле түләүләрдә таләп ителүе бар. Шуңа да картадан кулланыр алдыннан башта шартларны өйрәнергә киңәш ителә.

Фото: https://freepik.com