«Ни гаебем бар минем, парк белән күрше яшәп тә, һаман да ябыга алмаганга?!»

Җыена торгач, тәки җыенып беттек. Чираттагы ялыбызда, иртәнге сәгать тугызда, кем әйтмешли, как штык, парк каршында очраштык бүлектәге алты хатын-кыз. Иң беренче, капкадан кереп бераз баргач, милли ризыклар сатыла торган «Түбәтәй» киоскы янында тукталдык. Бүлек җитәкчебезнең күзе анда сатыла торган өчпочмакларга төште. Җитәкчедән калышып булмый инде, әллә ни уйлавы бар - барыбыз да өчпочмаклар белән сыйландык. Борыннарны кытыклаган, авыздан сулар китереп, телеңне йотарлык тәмле исләр бассейн яныннан җәһәт кенә үтеп китәргә мәҗбүр итте. Без, яшь тайлар кебек, тәмле ис килгән якка ыргылдык. Югыйсә, коену костюмнарын да алган идек. Кафеда сыйлангач, ашаганны сеңдерик дип, аллея кырыена куелган эскәмияләргә утырып, роликлы тимераякта шуучыларны, велосипед, скейтбордларда йөрүчеләрне күзәттек. «Шахмат клубы» мәйданчыгында да булдык. Карап торучыларга кушылып, уйнаучыларга бәя биреп, хәтсез генә вакыт басып тордык.

Бераздан барыбызның да чәй эчәсе килә башлады. Чәй эчәсе килгән кешегә, Ходайга шөкер, паркта бөтен шартлар да тудырылган! Чираттагы кафега кереп, пирожныйлар белән рәхәтләнеп чәй эчтек. Вакытны бушка уздырмадык - тәрәзәдән җир стадионы - чирәмлектә ир-егетләрнең туп типкәннәрен карап утырдык. Шунда бер хезмәттәшебез: «Ярты көн үтеп тә киткән бит, кайтыйк, ашарга да әзерлисе бар», - диде. Тамак тук, өс бөтен дигәндәй, каршы килүче булмады.
Йә, әйтегез инде, нинди гаебем бар минем, парк белән күрше яшәп тә, һаман да ябыга алмаганга?!

^{Фото бизәү өчен бирелде}