«Шәһри Казан»га язылучыларны Кыш бабай белән Кар кызы котлады (ФОТОРЕПОРТАЖ)

"Ниһаять, журналистлар, язучылар да базарга чыкты",- дигән иде Камил Кәримов беренче атнада ук. Һәм коллегабыз әйтмешли, бу безгә ошый. Нишләсен, үз абунәчесен саклап калу, тиражны киметмәү өчен тырыша журналист халкы. Ошый, чөнки халык белән турыдан-туры очрашабыз. Үзебезне кемнәр укыячагын шунда ук күрәбез... Инде менә газета-журналларга язылу кампаниясе төгәлләнеп тә килә. "Татмедиа" ширкәте дә язылу кампаниясе кысаларында менә шундый төрледән-төрле акцияләр, бәйгеләр уйлап чыгарып кына торды. Моннан, әлбәттә редакцияләр дә, газета укучыларыбыз да ота.

Безнең татар халкы барабыр газета укып тәрбияләнгән бит ул. Газетасыз яши алмый. Аннан кәҗәсендә түгел мәзәгендә дип, язылган хутка, абунәчеләр арасында барган лотерея уенында бүләк отуың да бар бит әле. "Амин" дигән чагына туры килсәң, ташламалы бәядән язылу да ярап куя. Шулар өстенә мондый акцияләр вакытында һәр редакция алдан әзерләп куйган күчтәнәче белән сөендерергә дә онытмый. Ике куянны бергә тотуга килгәндә, абунәчеләрнең чыннан да бәхетләре бар.

"Татмедиа" акционерлык җәмгыяте игълан иткән «Языл һәм сәлам юлла!» акциясе турында әйтүем әле. Соңгы атналарда "Казан" агропромпаркына килүче безнең әбүнәчеләр дә бу форсатны кулдан ычкындырмады. Моның өчен нишләделәрме? Әлбәттә инде, иң башта "Шәһри Казан" га язылдылар һәм шунда ук "Татар радиосы" аша якыннарын, туганнарын туган көннәре, якынлашып килүче Яңа ел белән котладылар. Түшәк өстендә ятучы туганына елый-елый ныклык, сабырлык теләүчеләр дә булды арада.

Үткән шимбәдә Агропромпарктагыларга тагын бер сюрпиз булды. Газетага язылучыларны Яңа ел белән котларга дип, Кыш бабай белән Кар кызы килде. Буйдан-буйга тезелеп киткән өcтәлләрдә нинди генә газета-журналлар юк. Чыннан да җанга якынын сайлыйсың. "Шәһри Казан"ны туганнарына, әти-әниләренә Яңа ел бүләге итеп яздыручылар да шактый булды. 2017 елда да безнең белән бергә булганыгыз өчен рәхмәт сезгә, укучыларыбыз!