12 июнь – Россия көне! Илебезнең куәте артсын!

Россия көне бәйрәме ватанпәрварлек, Россия халыкларының илкүләм бердәмлеге, илнең киләчәге өчен уртак җаваплылык төсмере ала бара.

Казанда 12 июньдә – Россия көненә багышлап бәйрәм программасы әзерләнгән.
9.00 сәгатьтә Кремль яр буе урамында яшьләр оешмалары активистлары, милли-мәдәни мөхтәриятләр әгъзалары, үзебезнең һәм чит ил студентлары “Халыклар дуслыгы” маршында уза. Биредә ярминкә-сәүдә дә оештырыла.

11.00 сәгатьтә Казан районнарындагы паркларда концертлар башлана.
11.00 сәгатьтә Җиңү паркында скульптор Александр Кислов проекты буенча төзелгән Сугышчы-интернационалистлар һәйкәле ачыла.
18.00 сәгатьтә Кремль яр буе урамында зур концерт башлана. Анда Татарстанның иҗат коллективлары, республиканың атказанган артисты Айдар Галимов,

Россиянең эстрада йолдызлары МакSим, Андрей Державин, “Сталкер” төркеме катнаша.
22.00 сәгатьтә – бәйрәм салюты. Казансу буенда салют ачык һәм матуррак булып күренә.
 Казан мэры Илсур Метшин мэриядә узган киңәшмәдә әйткәнчә, Россия көне – барлык гражданнарны берләштерүче бәйрәм ул.
 – Казанда актив кешеләр яши. Алар белән паркларны һәм скверларны, “Безнең ишегалды” программасы буенча капиталь ремонт эшләре турында фикерләштек. Казанның тарихи үзәген саклауда Генераль планда чишелешләр таптык. Шушындый актив, үз шәһәрен яратучы кешеләр тырышлыгында Казан яхшыра бара. Алар шәһәребезнең, илебезнең чын ватанпәрварләре, – дигән иде бер чыгышында мэр Илсур Метшин.
 12 июнь – күршеләребез Уфа, Ижевск, Саранск, Ульяновск, Түбән Новгород шәһәрләре көне дә. Аларны икеләтә бәйрәмнәре белән котлыйбыз!

... Төрекләр үз илләре белән чиксез горурлана, анда һәр бинада һәм хәтта, йорт болконнарында Төркия флагы җилферди. Сүрия гражданнарының үз илләрендә сугышларның бетүенә, тыныч тормыш башлануына өметләнүләрен күрәбез.

Әлбәттә, “диван экспертлары” шикелле сәясәттән, сәнәгатьтән, социаль өлкәдән кимчелекләр чүпләп, чебеннән фил ясап утырырга була ул. Без киресенчә, шул кимчелекләрне бетерү, тормыш-көнкүрешне алга этәрү өчен бердәм рәвештә эшләсәк иде. Россиянең куәте артсын! Бердәмлекне сакласак илебез алга барыр, бәйрәмнәребез дә булыр.

Татарстанда бу атнаның ял көннәрендә милли бәйрәмебез – Сабан туйлары да уза бит. Россия көне һәм Сабантуй бәйрәмнәре белән котлашыйк!