18 яшьлек бәйрәм ничек үтте?

Радионы булдыру идеясе «Барс-­Медиа» компанияләр төркеменә килгән. Аны чынга ашыру өчен күп кенә еллар үз «курсын» табарга һәм көч куярга туры килде. Бүгенге көндә ­радио ешлыкларында заманча татар эстрада җырлары һәм күптән таныш алтын хитлар яңгырый, күп кенә кызыклы тапшырулар чыга башлады – «Уян, Татар!», «Менә мондый кич», «Хәерле иртә, Австралия!» Болар барысы бергә радиостанцияне тамашачыларбыз өчен тагын да кызык­лы яктан ача.
18 ел дәвамында «Татар радио­сы» студиясенә күп кенә хөрмәтле кунаклар килде. Алар арасында – җырчылар, актерлар, иҗат төркемнәре, сәясәтчеләр, бизнесменнар, төрле өлкәләрдәге экспертлар. Һәрберсе радио тарихына үз өлешен кертте. 2017 ел радио өчен аеруча әһәмиятле булды. Студия­гә кунакка Татарстан Президенты Рөстәм Миңнеханов килде, эфирга чыгып, тыңлаучыларга хәерле көннәр теләде.
Җитәкчеләр, диджейлар, төрле белгечләр алмаша барды һәм аларның һәрберсе радио тормышына, динамикасына үз өлешен кертте. Алардан башка «Татар радиосы» бүгенге урынында булмас иде.
Бик күп креатив проектлар – «Җәйге ачык студия», 5 көнлек «Автопробег. Казан – Кырым – Казан»... Бу проектлар вакытында туры эфирга чыгуны һәр тыңлаучы көтә иде. «ТМА» дискотекасы, «Шәһәр көне» концертлары, «Музыкаль десант», «Музыкаль Каймак», «Изге Вәли», «Татар җыры» – болар барысы да «Татар радиосы» ярдәмендә эшләнә торган проектлар. Беренче татар дискотекалары һәм кичәләре, татарларга гына хас атмосфералы фестивальләр – барысы да «Татар радиосы» белән бәйле.
Күпьеллык хезмәтнең җимеше – «Татар радиосы»ның «Пирамида»да узган концерты. «Татар радиосы» бу кичтә тыңлаучыларга күп сюрпризлар әзерләде: Казанның танылган кавер-группасы «Блэк-джек» башкаруында инструменталь музыка, «on air» радиоэфир атмосферасы, тере тавыш, легендар хитлар һәм алып баручыларның оста импровизациясе. «Татар радиосы» бәйрәм атмосферасын булдырды, тамашачыга позитив якты кичә бүләк итте. Радиостанциягә 18 яшь тулды! Киләчәк туган көнен тагын да грандиоз рәвештә бәйрәм итәргә вәгъдә итте «Татар радиосы».