35 ел элек Яруллиннар туган туфракка әйләнеп кайта

Сөбханалла, безнең гаиләбездә сигезенче онык дөньяга килде. Исән-сау булып, хатыны Инзилә белән балаларының игелеген күреп, шатлык-куанычлар белән яшәсеннәр. 

Монан 35 ел элек, улым Урта Азиянең Караком чүлендә урнашкан Небит-Даг шәһәрендә дөньяга килде ул. Әтисе атаклы футболчы Вәгыйз Һидиятуллин хөрмәтенә аңа Вәгыйз исемен кушты. Ул чорда заманалар тыныч түгел иде. Урта Азия республикасында күтәрелеп алган фетнәләр безнең шәһәргә дә килеп җитте. 

Мәңге онытасым юк, 9 май көне иде. Бөек Ватан сугышы ветераны әтиебезне, тыл ветераны әниебезне хөрмәтләп бәйрәм иттек. Әти белән әни сугыш чоры истәлекләрен яңарттылар. Әти баянын кулына алып, татар көйләрен сузды, без әни (каенанам) белән баянга кушылып җырлап утырдык. Аларны озатып өстәл җыештырырга гына тотынган идем, еракта умарта күче гүләгәндәй тавышлар ишетелде. Тавышлар якынайганнан якыная барды.  Ике айлык баламны күтәреп урамга йөгереп чыктым. Урам тутырып кулларына факеллар тоткан ирләр төркеме килә. Юлларында очраган машиналарга ут төртәләр, лозунгларында сәер сүзләр... Баламны куеныма кыстым да, белгән догаларымны укый-укый тиз генә ишекне бикләдем... Икенче көнне, шушы җирдә кендек каны тамган, яхшы эш урыны булган ирем Рәис әйтеп куйды: “Монда калмыйбыз, китәбез. Безнең бу балалар ни татар, ни төрекмән булмаячак. Үсеп җиткәч югары уку йортларына да кереп укый алмаслар, Татарстанга күченәбез”, – диде. 

Туган туфрак та таркандыр, тиз арада Апас район үзәгенә күченеп киттек. Торырга йорт-җир дә юк, эш тә. Балалар да тарча белми. Һәммәсен дә булдырдык. Балаларыбыз кул арасына кереп, хуҗалык эшенә булыштылар. Җитмәгәне торып торды. Бер-бер артлы Казаныбызның төрле югары уку йортларында белем алдылар, мәртәбәле эш урыннарына урнаштылар. Иң мөһиме – максатыбызга ирештек, өч улыбыз да татар телендә яхшы итеп сөйләшергә өйрәнде. 
35 ел элек туган Вагыйз улым, адашы кебек спортчы. Россиякүләм триатлон ярышларының берсен дә калдырмый. Төркиянең Белек шәһәрендә узган Бөтендөнья Триатлонда катнашып, медаль яулады. Тормыш иптәше Инзиләсе аңардан бер адым да калмый, видеога төшереп бара. Кызым, 90 чакрым велосопедта чапканда ничекләр чыдыйсың, дим. “Әни, мәхәббәт барысына да көч бирә”, – дип елмая киленем. Шулай гына була күрсен!

Зәйнәп Яруллина. 
Апас бистәсе.