Армыйча эшләгез: Россиядә пенсия яшен арттыралар

Пенсия яшен 2019 елда аз-азлап арттырырга җыеналар. Әлеге арттыру адымнары ир-атлар өчен 2028 елда, хатын-кызларга 2034 елда тәмамланачак.

Закон проекты кабул ителгән очракта киләсе елдан россиялеләрнең лаеклы ялга чыгу яше ел саен бер елга арта башлый, бу пенсиягә чыгып өлгерүчеләргә кагылмый.

Премьер-министр Дмитрий Медведев фикеренчә, пенсия яшен арттыру турындагы карарлар бик четерекле, әмма дәүләт шуннан башка социаль өлкәдә дә, яшәү дәрәҗәсен үстерү һәм икътисад өлкәсендә дә шунсыз алга китә алмаячак.

Шулай итеп, киләсе елда пенсия яше җиткән 1959 елгы ир-атлар һәм 1964 елда туган хатын-кызлар пенсиягә 2020 елда 61 һәм 56 яшьтә чыгачак.

1960 елгы ир-атлар һәм 1965 елгы хатын-кызлар пенсиягә 2022 елда чыга ала. Алга таба шул «адым» сакланачак.

Халыкта канәгатьсезлек тудырган әлеге үзгәрешне инфляция чиген узып, пенсия күләмен арттырырга мөмкинлек бирәчәк, ди хакимияттәгеләр. Әлеге закон проекты каникуллардан соң кабул ителеп, гамәлгә керер дип фаразлана.

Фото: pixabay.com