"Бер көндә уртача 40-45 километр юл үтәбез": якут иленнән Казанга кадәр атларда

Дугуйдан 1 ел һәм 3 ай юлда, Казаннан Мәскәүгә кадәр араны үтәргә, аңа улы Дархан да булышачак. 
Якут атлары - иң борынгы төрләрнең берсе. Алар татар атларыннан тәбәнәк буйлы, зур башлы һәм борынлы булуы белән аерылып тора. Саха породасы 70 градуслы салкынны да, 40 градуслы кызуны да яхшы кичерә. 
- Юлга атлар сайлап утырмадык. Әти кайсыларын бирде, шуларын алдым.  Якутның ике якын дусты бар: пычак һәм ат. Без бернәрсәгә дә аларны алыштырмаячакбыз, - диде Дугуйдан Винокуров.

Атта сәяхәт итү идеясе 2018 елда барлыкка килгән. Якутиядән 4 ат һәм 2 җайдак чыккан. Казанга кадәр 2 ат кына килеп җитә.
- Юлда бик күп үзгәрешләр булды. Урал тауларын кичкәндә, атларны машинада үткәрергә куштылар. Кышын федераль трассадан бардык, чөнки юл кырыенда кар күп иде. Җәйге вакытта кырлар, урманнардан узабыз. Атларның хәлен күзәтеп торам. Бер көндә уртача 40-45 километр юл үтәбез. Узган елны Якутия урманнары янды. Шулай, Көньяк Якутиядән узганда, атлар нарат урманында 3 тәүлек ашамады. Алар чыдамлылыкларын тулысынча исбатлады. Татарстан безне яхшы каршы алды, һәр район бавырсак, чәчәкләр белән сыйлады, - диде Дугуйдан Винокуров.

Татарстан Республикасында Якутларның милли-мәдәни берләшмәсенә 8 ай гына. Әмма алар зур проектларны чынга ашырырга һәрвакыт әзер. Республикада якут этноҗирлеге төзү өчен территория бүленеп бирелгән. Әлеге проект халыкны милләтнең мәдәни үзенчәлекләре, гореф-гадәтләре белән таныштырачак. 
- Быел Ысыах бәйрәме вакытында, Якутиядә Татарстан Республикасы көннәре узды. Сабантуй бәйрәме үткәрелде, шуңа күрә якут халык бәйрәме булмады. Киләсе елга Ысыахны яңа җирдә үткәрербез, дип өметләнәбез, - диде Татарстан якутлары иҗтимагый оешмасы җитәкчесенең беренче урынбасары Марат Третьяк. 

Дугуйдан Винокуровның сәяхәте атчылык белән шөгыльләнүчеләрне дә битараф калдырмаган. Ат үрчетүче Фәрит Нәбиуллин якут породасын Татарстанга алып килү теләген белдергән. Шулай ук, Башкортстанда якут һәм башкорт атлары чабышы уздыру планлаштырыла. 

Республика кунаклары Казаннан 1 июльдә кузгалачак. Аларның киләсе тукталышы – Мәскәү. 

Илгизә Галиуллина