"Бернәрсәсез калдык - бар булган әйберебез янып бетте"

Альбина Христофорованың йорты, каралты-куралары мизгел эчендә янып, көл өеменә әйләнә. 
— Бәхетсезлек электр чыбыкларының төзексезлеге аркасында килеп чыккан дип фаразлана. Әлегә тикшерү бара, - диделәр безгә республика гадәттән тыш хәлләр министрлыгының матбугат хезмәтендә. 
Альбина төне буе янгын урынында күз дә какмыйча, пыскып торган урыннар янәдән янып китмәс өчен кизү торган.

— Ничә еллар буе төзегән, күпме көч түккән өебез, гомер буе җыйган мал-мөлкәтебез бер мизгел эчендә янып бетте. Өстебездә ни бар, шуның белән урамда калдык. Документларны да ала алмадык. Үзем янгын чыккан вакытта, балалар белән (ред.искәрмәсе: олы улы армиядә хезмәт итә, уртанчысына 18 яшь, кече кызына 11 яшь) бакчадагы түтәлләргә су сибеп йөри идек.  Йортның түбәсе яна башлады, шул санаулы минутлар эчендә бөтен җирне камап алды. Ут бик көчле иде. мөстәкыйль рәвештә үзебез генә сүндерә алмадык. Ичмасам, йорт-җир дә иминиятләштерелмәгән. Тынычлана алмыйм, янып беткән өйгә карыйм да, елыйм. Ничек яңа йорт төзисе булыр, - ди Альбина Христофорова (Хәсәнова). 
Альбина берничә ел элек ирен югалткан, өч баланы бер үзе тәрбияли.