"Без, намазлык өстендә утырып, киленнәр өченче яки дүртенчегә балага узарга уйласа, «алып кайтма», дибез..."

50 процентка якын бала катнаш никахта туган. Бу – 20 ел үткән саен татар халкының балалары дүрт тапкыр кими дигән сүз. Катнаш никах аркасында Төркиядә бөтен грек кызларыннан төрек ясап бетерделәр, ә бездә татар кызлары яки татар егетләреннән рус баласы туа. Ул безнең санны киметә. «Нәселне саклау» дигәндә бала үзенең телен, динен, милләтен, нәселен белеп, горурланып үсәргә, үз халкына тартылырга тиеш.

...Китаплар да чыга, программалар да төзелә, дини тәрбия үзәкләре дә ачыла. Гаиләләрендә 5-6 бала тәрбияләп үстергән хәзрәтләребез дә бармак белән санарлык. Бу проблемага да игътибар бирсәк иде. Аллаһы Тәгалә Коръәндә: «Һәр бала үз ризыгы белән туа», – ди. Барыбыз да иманлы, дин көчәя, мәчетләребез арта, дибез, балалар артмый бит!

Безнең ил, шул исәптән татар халкы да, бала төшерү статистикасыннан калышмый – дөньяда беренче урында тора. Көн саен 11 мең баланың җаны кыела. Без, намазлык өстендә утырып, киленнәр өченче яки дүртенчегә балага узарга уйласа, «алып кайтма», дибез. Намаз укучылар кызларга шундый «акыллы» киңәшләр бирә.

Динебезне халыкка җиткергәндә, аят-хәдис ятлату белән генә чикләнмик, гаилә кыйммәтләрен дә аңлатыйк: кызларыбызны әни булырга, егетләребезне әти булырга әзерләмибез. Егет бит әти булырга, гаиләсен алып барырга тиеш. Моны өйдә дә өйрәтмәсәк, мәдрәсәдә өйрәтүче булмас.

Җәлил хәзрәт Фазлыев, Татарстанның баш казые («Бишенче Мәчкәрә укулары»төбәкара конференциясендә ясаган чыгышыннан).
“Интертат”.