"Безнең этләр өйдә яши, шампунь белән юып торабыз. Йоннары да бик файдалы..."

Сөйләшеп киткәч, 34 ел стоматалогия өлкәсендә эшләве, шул ук вакытта җир, бакча эшләре яратуы, буш вакытында эт йоныннан кул эшләре бәйләве ачыкланды. Соңгы шөгыле мине кызыксындырды да.     
– Элек әнием эт йонын буыннар авыртканда, радикулиттан куллана иде. Ләкин ул аннан әйберләр бәйләмәде, авырткан җиргә йонын гына куя иде. Җайлырак булсын, дип мин аның өчен дә, үзебезгә дә оекбаш, тезгә, билгә билбаулар бәйли башладым, – дип аңлатты ул әлеге шөгыленә кешү хакында сорашкач.

– Әлеге йонның файдасы нидә?
– Ул тәнне җылыта. Менә шуңа да ул буыннар авыртуыннан ярдәм итә. Кайбер йоннар каты, чәнечкеле була. Андыйлар – тәндәге кан йөрешен яхшырта. Чәнечкеле йоннардан оекбаш бәйлим – кышкы зәмһәрир суыкларда да аяк туңмаслык булсын. 

– Йонны ничек җыясыз?
– Этебез Боня елына ике тапкыр йонын коя. Аңа – рәхәт, безгә – файда булсын, дип мин ул вакытта аны махсус тарак белән тарыйм. Коелган йонын төсләре буенча сортларга бүлеп җыеп барам. Файдасын белә торып шушы байлыкны ыргытырга кулым бармый. Соңыннан йонны яхшылап юам, киптерәм. Ул башка йоннардан әллә ни аерылмый да. Аннан шапалыйм, ягъни ая белән аялыйм. Вакыт булганда кул белән эрләргә тырышам, алай җеп матуррак, юкарак була. 

– Теләсә кайсы эт йоныннан әйберләр бәйләп буламы? Эттә булган бетләр кул эшләренә күчмиме? 
– Озын йонлы этләрнеке яхшырак. Безнең Боня шелти токымыннан. Кызымның эте – самоед. Аларның йоннары бәйләү өчен бик уңайлы. Самоедлар әле аллерегия бирми. Бетләргә килгәндә, безнең этләр өйдә яши, шампунь белән юып торабыз. Йон җыеп алынгач та берничә кат эшкәртелә, юыла, тарала. Бетләргә караганда, көя күбәләгеннән күбрәк куркырга кирәк. Озак киелмәгән йонлы киемнәргә ияләшә ул.   

– Заказларыгыз Россиянең нинди шәһәрләренә китә?
– Эшләрем күбрәк үзебезгә, дус-иш, туганнарга таралып бетә. Вакыт булганда гына заказга бәйлим. Җан тартканга гына бу эшкә алындым. Кул эшләремне интернетка куйгач, башкалар да сорый башлады. Шулай итеп йон оекбашларымны Кострома, Мәскәү, Казан, Пермь, Калуга, Түбән Новгород, Белоруссиядә киеп йөриләр хәзер. Күп кеше җылы булганда балаларына нәкъ менә эт йоныннан бияләй, оекбашлар сорый.

– Бәйләнгән кул эшләрен ничек дөрес итеп юарга?
– Кул белән яки кер юа торган машинада “йон юа” торган режимда юабыз. Эт исен теләсә нинди шампунь бетерә. Балалар сабыны, йон юу өчен булган “Ленор” да яхшы. Керне юып бетергәч, кондиционер белән чайкап алсагыз, йон эшләнмәләре тагын да йомшак була. Бәйләнгән киемнәрне җепкә эләргә ярамый. Тастымал өстенә яткызып кына киптерегез.