Бөтен туганнар җиңгине хыянәттә гаепләде. Абый үзе хыянәт иткән икән...

...Абый белән җиңги 26 ел бергә торгач аерылды. Яшьтән өч ел очрашып өйләнешкәннәр иде. Икесе дә яшь белгечләр, заводта эшли башладылар. Шуннан аларга бер бүлмә бирделәр. Иң зур байлыклары шул булды. 

90нчы елларда завод айлар буе хезмәт хакы түләмәгәч, булган бар акчасын җыеп, сантехника кибете ачтылар. Абый товар ташып торды, җиңги сатты. Кыз һәм ул үстерделәр. Ике балаларына да фатир алдылар. Улларына – машина. Үзләре дә шәһәр читендәге зур йортка күченде. 

Кызларын кияүгә биргәннән соң араларында кара мәче узды. Янәсе, җиңги хыянәт итә! Бөтен туганнар аны гаепләде. Өчесе арасында иң яраткан киленем дип шул җиңгине гел кабатлый торган әнкәй дә абыйны яклап чыкты. Үз улы бит, ә җиңги кеше баласы! “Мин гаепле түгел, намусым чиста”, – дип идәнгә тәгәрәп елаган җиңгине мәңге онытасым юк! 

Аерылгач, йортны сатып, акчасын бүлделәр. Бизнес абыйга калды, машина җиңгигә. Түгәрәк дөнья ике-өч ай эчендә шулай кыйпылчыкларга ватылды да бетте. 
Ә аерылышудан соң ярты ел узгач... абый яшь хатынга өйләнде! Хыянәттә гаепләнгән җиңги кияүгә чыкмады, абый өйләнде! Барыбыз да шаккатты, әлбәттә. Әни яшь киленгә баштагы елларда гел җиңги исеме белән әйтә иде.

Әнидә яман авыру табып, онкология хастаханәсенә эләккәч бик озак операция ясамадылар. Моны танышлар аша ишеткән җиңги шул ук көнне әни янына барган, тиешле табибларын табып сөйләшкән. Ике көннән операцияне ясадылар да. Әни дә хатаның абыйда булуын аңлады булса кирәк. Җиңгигә башка каты бәрелгәне булмады. 

Әни вафатына кадәр улы белән җиңги хәл белергә кайтып йөрде. Әнине дә җирләргә кайтты. 

Яшь килен исә Сабан туена бер кайтып, кәеф-сафа корып китә дә, шуның белән бетте. Абый да 60ны узды, инде оныклары мәктәптә укый. Яшь хатынга ярыйм дип, чал чәчләрен ай саен буятырга йөри. Күңеленнән бәлки үкенәдер дә кеше сүзенә ышанып, гаиләсен җимерүенә. Тик терсәкне инде тешләп булмый...

Сәгыйть Хафизов