#Язмалар 16 март 2022, 14:47

Чүпкә дә “счетчик” куярлармы?

16 март 2022, 14:47

Моннан бер ел элек Президент Владимир Путин чүп чыгару тарифларын җайга салу йөкләмәсе биргән иде. Россия лидеры чүп чыгарган өчен түләүләрне мәйданга карап түгел, ә фактик күрсәткечләрдән чыгып алырга кушты. Бер ел узса да, бу юнәлештә әле алга китеш сизелми кебек.

Скопировать ссылку

Дәүләт Советының бүгенге утырышында депутат Олег Коробченко федераль дәрәҗәдә инициатива белән чыгарга тәкъдим итте. “Бәлки сайлау мөмкинлеге булдырыргадыр? Кем квадрат метрдан чыгып түләргә тели, кем факт буенча. Эшмәкәрләр судларга мөрәҗәгать итә һәм төбәк операторыннан ниндидер куркыныч оешма ясый. Инде бер ел каршылыклар бара”, - ди Коробченко.

Эшмәкәрләрнең хокукларын яклау буенча вәкаләтле вәкил Фәрит Габделганиев моның “сакаллы мәсьәлә” икәнен ассызыклады.

“Татарстанның Төзелеш, архитектура һәм торак-коммуналь хуҗалык министрлыгы һәр сезон өчен күпме чүп чыкканын санарга тиеш иде. Бу эш 31 мартта төгәлләнергә тиеш, шуңа бераз көтик. Әлбәттә безнең үзебезнең тәкъдимнәребез дә бар. Мисалга, санау җиһазы урнаштырырга була. Андый тәҗрибәләр чит илләрдә кулланыла, әлбәттә алар күпкә алга киткән. Россия Хакимиятенә юллаган сорауга әле без җавап алмадык. Әлбәттә бу сорау игътибарсыз калмаячак”, - диде Фәрит әфәнде. Көнкүрештән калган калдыкларны эшкәртү мәсьәләсе дә кискен тора, ди вәкаләтле вәкил. Әгәр дә эшмәкәрләр мондый төр калдыкларны эшкәртү буенча оператор вазыйфасына алынырга теләсә, ярдәм булачагын да билгеләп үтте.

Парламент Рәисе Фәрит Мөхәммәтшин да чүп чыгару операторларына дәгъваларның күп булуын искәртте.

“Әмма без аларны ниндидер мөртәт итеп күрсәтмибез. Чүпне бетерү, аерым җыю, эшкәртү буенча Россиянең бер субъектында да ысуллар таба алмыйбыз. Бу ачуны китерә. Чүп җыю урыннарында этләр җыела. Бәлки хәзерге шартларда бу иң мөһим мәсьәлә дә түгелдер. Тик ул ризасызлык тудыра. Безгә мәсьәләне чишү юлларын табарга кирәк”, - диде Фәрит Мөхәммәтшин.

Кызыклы яңалыкларны күзәтеп бару өчен безнең МАХ каналына кушылыгыз.

#чүп эшкәртү, калдыклар эшкәртү, экология