Ерак юлларга йөрүче Ринат Биктимеров: «Татарстан кебек төзек, чиста төбәкләр юк дәрәҗәсендә!»

Ринат абый Кайбыч районы Шуширмә авылында туган. Аңа 55 яшь. Кайбычтагы СПТУда шоферлар курсын тәмамлап, үзенең күптәнге хыялын чынга ашырган – машина руле артына утырган. Шул дәвердән бирле хезмәт кенәгәсендә шофер дигән язу барлыкка килгән дә, ул бердәнбер булып калган. Хәер, оешма атамалары гына үзгәреп торган анысы. Кайда гына хезмәт куймасын ярдәмчел шоферны һәркем хөрмәт иткән, чөнки ул аларга җылы сүзе һәм игелекле мөнәсәбәте белән ярдәм иткән.

– Хатыным Резидә белән ике дистә елга якын бергә тату һәм бер-беребезне кайгыртып яшибез. Нинди генә ерак юлларга чыгып китсәм дә, борчылып, кайгыртып тора. Өйдә кайнар ризык, ачык йөз белән каршы алучы булмаса, шулай ерак юлларга чыгып йөреп булмас иде. Иң мөһиме – ныклы, ышанычлы тыл, өемә кайтыр юлым өзелмәсен, – ди Ринат абый.

«Трал» белән Байкал аръягыннан төрле оешмаларга зур техникалар ташый ул. 
– Россиянең төрле төбәген йөреп чыкканмындыр инде, Кытай белән чиккә кадәр барып җиткәнем дә булды. Кышмы, җәйме – заказны үтисе. Шуңа бер чыгып киткәннән ике айлап йөреп кайтам. Аннан ике атна ял итәм. Юлда нинди генә хәлләргә юлыкмыйсың, ватылып калган чаклар да була. Игелекле затлар күп, ярдәм итәләр. Кышкы бураннарда, әлбәттә, юлларда озаграк та утырган вакытлар бар. Шуңа рейска чыгар алдыннан хәстәрлек турында да уйларга кирәк, – ди Ринат абый.

Ерак юл ул – биек таулар, чакрымнарга сузылган урманнар озын күперләр, карлы, яңгырлы юллар, фаралар яктысы, тирә-якта озатып калучы шәһәр-авыллар. Юлга чыгып китәр алдыннан, беренче эш итеп машинасын тәртиптәме икән дип карап чыга ул. Ә машинасы һәрчак чиста. Елның һәр фасылында, эссе яки буран булсынмы – теләсә кайсы һава торышында да пөхтә һәм тиз йөри. Җитәкчелек аны шуңа күрә дә һәрчак ерак юлга ышаныч белән чыгарып җибәрә. 

– Тәртиптә, карап тотудан да күп нәрсә тора, балаларны да кече яшьтән үк эшкә өйрәттек без. Ике улыбыз бар. Алар безнең горурлыгыбыз һәм шатлыгыбыз, хезмәт сөючән, тәртипле һәм киң күңелле кешеләр булып үстеләр. Ике оныгыбыз буй җиткезә хәзер, – ди Ринат абый. 

Сәламәтлекне аямый торган, гомерне куркыныч астына куючы һөнәр бу. Авырдыр... Тик Ринат абый "Татарстан кебек урманы да, суы да булган, төзек, чиста төбәкләр юк дәрәҗәсендә!" – ди горурланып. Ринат абый әйтмешли, өенә кайтыр юлы өзелмәсен.