Әфган авазы: көткәннәргә һәйкәл бар микән?!

Япь-яшь егетләрнең цинк табутларда кайтарыла башлаган вакытын күпләр яхшы хәтерли әле. Район, авыл саен кайта ул табутлар. Тик бу хәлләргә ышануы гына авыр була. Ә улларын әти-әниләр гомере буе көтеп яши. Әфган сугышы бик күпләрне әле дә йокысыннан саташтырып уята, күпләрнең йөрәгендә мәңгелек яра булып саклана. Бүген республикада әфганчыларның сугышчан батырлыгын хәтерләтүче төрле чаралар, истәлекле турнирлар уздырыла.

Әтнә районы Күңгәр авылында өченче ел рәттән Әфганстанда һәлак булган Күшәр авылы егете Зөлфәт Хәйруллин истәлегенә волейбол ярышлары үткәрелә. Быелгы турнирда 5 районнан 10 команда катнашты. Кукмара, Арча,  Биектау спортчылары белән беррәттән Әтнә районының үзеннән 5 команда тупланган. Ярышны Әтнә районы районын башкарма комитеты җитәкчесе Айрат Каюмов башлап җибәрде.
– Спорт белән патриотизм икесе янәшә бара. Спортны яратыгыз, шөгыльләнегез. Әфганга да физик яктан нык егетләр кертелгән. Күреп торасыз, алар бүген дә сезнең каршыгызда басып тора. Кызганыч, ике райондашыбызга әйләнеп кайту насыйп булмады, без аларны бүген искә алырга тиеш – дип сөйли ул.
– Без солдатлар идек. Безгә приказ бирелде, без аны намус белән үтәдек. Сугыш кирәкме-түгелме дип, бу сугыш турында күп сөйләргә була. Без дә ул чакта Әфганда террорчылар белән очраштык. Күпләребез яраланып кайтты, иптәшләребезне югалттык. Соңгы әфганчы исән булганчы, бу сугыш хакында сөйләрбез. Югалткан иптәшләребезне хәтерләп, аларның истәлегенә шулай турнирлар уздырып искә алыйк, ул көннәрне онытырга хакыбыз юк, – дип сөйли Әтнә районының әфганчылар оешмасы җитәкчесе Ленар Кәбиров.

Әфганчы Зөлфәт Хәйруллин турында истәлекләре белән дә уртаклаша ул. Күшәр авылы егете ефрейтор Хәйруллин Зөлфәт Зөфәр улы 1982 елның июнендә хәрби операция вакытында каты яралана, 9 июньдә госпитальдә үлә. “Батырлык өчен” медале белән бүләкләнгән  Зөлфәт Хәйруллин үле гәүдәсе   цинк табутта авылда сабантуй буласы көнне кайтарыла. Бәйрәм булмый кала. Барлык авылдашлары да Зөлфәтне соңгы юлга озата.
...Әтнәдә әфганчы Зөлфәт Хәйруллин истәлегенә багышланган ярышта Кукмараның “Степан Разин” командасы җиңү яулаган. Икенче урынны Биектауның җыелма командасы, өченче урында  – Әтнә районы Күңгәр командасы. Дүртенче урынны Кукмараның Зур Сәрдек командасы җиңү яулый.
Ә мондый ярышларны уздыру бик кирәк, яшь егетләр барысын да белеп торырга тиеш.