Фәрит Мөхәммәтшин: "Бүген эш бирүчеләргә югары белем турында диплом һәм эш тәҗрибәсе генә җитми"

Татарстан Дәүләт Советы рәисе Фәрит Мөхәммәтшин сүзләренә караганда, предприятиеләрнең цифрлы үзгәреш шартларында кадрларны әзерләү һәм яңадан өйрәтү темасы бик актуаль булып кала. Бигрәк тә Татарстанда игълан ителгән цифрлаштыру елында бу мәсьәләне өйрәнү мөһим. “Цифрлаштыру – көндәшлеккә сәләтле икътисадны үстерүгә һәм халыкның тормыш сыйфатын яхшыртуга юнәлдерелгән тенденция ул, – дип билгеләп үтте ул. – Ул оешмаларда технологик революциягә, үзгәртеп коруга гына түгел, ә хезмәт базарындагы үзгәрешләргә дә китерде”.
 – Бүген эш бирүчеләргә югары белем турында диплом һәм эш тәҗрибәсе генә җитми. Һөнәр яки белгечлек генә түгел, күнекмәләр һәм компетенцияләр вакыты да җитте, – дип ассызыклады Дәүләт Советы рәисе. Бу исә яңа икътисадый һәм технологик шартларда һәм эштә грамоталы итеп инновацион алымнар куллануны таләп итә. 

Гомумән, һөнәри юнәлеш бирү программасы бердәм булырга тиеш. Мәктәп – ВУЗ – эш бирүче бергә атларга тиеш, дип саный парламент башлыгы. 

Хәзерге вакытта Россия Федерациясе Хөкүмәте тарафыннан «Цифрлы икътисад» Милли программасы 2024 елга кадәр билгеләнгән. Ун проектның берсе – "Цифрлы икътисад өчен кадрлар” программасы исә Татарстанда Иннополис Университеты базасында гамәлгә ашырыла.

Балалар һәм яшьләргә һөнәри юнәлеш бирүгә килгәндә, Фәрит Мөхәммәтшин республика мәктәпләрендә, көллиятләрендә һәм югары уку йортларында яшьләргә эшкә урнашуда ярдәм итүче хезмәтләр булдырылган, бер үк вакытта вакансияләр ярминкәләре оештырылуын билгеләп  үтте. 
– Иң мөһиме, мондый эш системалы характерда булсын. Мәктәпне тәмамлаганнан соң  укучылар теге яки бу белгечлекнең эчтәлеген бик тә буталчык күзаллыйлар. Нәтиҗәдә, күп кенә студентлар инде беренче курсларда ук укудан җибәрелә, йә югары уку йорты тәмамлаганнан эшкә үз белгечлеге буенча урнашмый. Бу хәл кайбер белгечлекләр буенча кадәр 90 процентка кадәр күзәтелә, – дип сөйләде ул. 

Фәрит Мөхәммәтшин сүзләренә караганда, дәүләт ярдәме белән мәгълүмати челтәрләрдә яшьләргә һөнәр сайлауда ярдәм итүче махсус платформа һәм сайтлар булдыру максатка ярашлы булыр иде. Шулай ук чынбарлыкта реаль икътисад тудыручы, үз эшләрен  алып баручы кешеләр турында күбрәк сөйләргә кирәк,  дип саный парламент башлыгы.