Горурлык хисе

Казанның әлеге мәктәбе гади түгел. Үзенчәлекле. Анда нәниләр биш яшеннән үк укырга керәләр. Ә алтынчы сыйныфны тәмамлагач, барысы да диярлек, төрек татар лицейлары укучылары була. Җыеп кына әйткәндә, әлеге мәктәптә шактый дөнья күргән һәм киләчәктә дә күрәчәк малайлар-кызлар белем ала. Шуңа да биредә төрле телләр өйрәтүгә зур игътибар бирелә – ныклап торып дүрт телне белеп чыгалар. Ләкин иң зур игътибар туган телгә – татар теленә дисәк тә, һич арттыру булмас. Моның өчен мәктәп коллективы төрле юллар эзли һәм таба да. Туган тел бәйрәменә дә Казаныбызның Тукай музее хезмәткәрләрен чакырганнар. Бөек шагыйребезнең музее – төзекләндерүдә, ишекләре ябык булганга, бу очрашу ике як өчен дә файдалы. Тик Тукайны әйбәт белгән музей хезмәткәрләре: Лена Тябина һәм Ләйсән Медведева алдында чыгыш ясау укучыларга шактый зур җаваплылык та өсти. Каушасалар да гаҗәп түгел. Сөенечкә, Тукай әсәрләренә нигезләнгән заманча әкиятне төрле милләт балалары бик килештереп уйнадылар. Чын артистларча. Директор Илсур Миндубаев та, кырык эшен кырык якка куеп, үз укучыларының чыгышын карап утырды. Аларның Тукайны яратулары аңа да сөенеч бирә. Җитәкче – туган тел мөгаллиме.