Инженерларга өметләр зурдан

- Россия Президенты Владимир Путин, инженер һәм техник белгечләр әзерләүне камилләштерү Россия өчен, икътисад һәм сәнәгать өчен, агросәнәгать өчен беренчел әһәмияттәге бурыч, диде. Илебездә алдынгы инженерлык мәктәпләре челтәре булдыру максаты куелды. Россия Президенты йөкләмәсен үтәп, Чаллыда “Кибер Авто Тех” оештырылды. Татарстан Президенты Рөстәм Миңнеханов проектны гамәлгә ашыруда теләктәшлек күрсәтте, - диде Казан федераль университеты ректоры вазифасын башкаручы Дмитрий Таюрский.

Чаллыга урнашу очраклы хәл түгел. Кама сәнәгать агломерациясендә әйдаман биш индустриаль үзәк динамик үсештә. Россия сәнәгатенең тулаем продуктының 3 проценты биредә җитештерелә. Шушы агломерациядә урнашкан предприятиеләр өчен генә дә, ел саен 5 меңнән артык инженер-техник кадрлар таләп ителә. 

Казан федераль университетының инженерлык мәктәбе “интеллектуаль автомобиль”, “түбән /ноль углерод калдыклы автомобиль”, “интеллектуаль җитештерү технологияләре” юнәлешләрен тагын да җанландырыга омтыла.
- Санкцияләр шартларында чит илләр товарларына алмаш булдыруга мөмкин кадәр тизрәк ирешергә кирәк, - диде Дмитрий Таюрский.

Уңай мисаллар да күрсәтелде. Казан федераль университеты, заводлар һәм фәнни оешмалар белән уртак хезмәттәшлектә, 2025 елга электр йөк машиналары җитештерә башлауны планга керткән. Машинаның аккумулятры да үзебездә җитештерелә башлаячак. 2026 елда водород ягулыклы пилотсыз йөк машиналарын җитештерүгә кую ниятләнелә.

Казан федераль университетының икътисад һәм стратегик үсеш мәсьәләлре буенча проректоры Марат Сафиуллин сөйләгәнчә, Чаллыдагы “Кибер Авто Тех” инженерлык мәктәбендә предприятиеләрнең инженер-техник кадрлары белемнәрен күтәрәчәк.
- ВУЗ студентлары, мәктәп укучылары да лекцияләргә килә алачак, - диде Марат Сафиуллин.

Казан федераль университетының алдынгы инженерлык мәктәбе эшчәнлегенә алдагы 2,5 елда 30 миллиард сум күчереләчәк. Шәхси инвестицияләр дә җәлеп ителә. Югары технологияле компанияләр быел 4 миллиард сум бирергә җыена.