Ирада Әюпова: "Артист сәхнәгә чыга икән, “мин фонограммага җырлыйм” дип ачыктан-ачык әйтергә тиеш"

Мәсәлән, журналистлар Ирада Әюпованың Казан халыкара мөселман киносы фестивале турындагы фикере белән кызыксынды. “Мәдәният өлкәсендәге теләсә кайсы чараның үз концепциясе, үз фәлсәфәсе булырга тиеш. Ә мөселман киносы фестивалендә ул юк. Минемчә, Миләүшә Ләбибовна төрле юнәлешләрдә эшләп карый, эзләнә. Омтылышлар бар. Ачылу һәм ябылу тантаналары кызыл келәмнәр белән зурлап үткәрелә. Ләкин бу фестивальнең асылы – кызыл келәм түгел, ә аның тирәсендәге дискуссия”, - диде министр.

Бер журналист Казаны циркында намаз уку бүлмәсе ачылуга канәгатьсезлек белдерде. Янәсе, андый намаз бүлмәләрен ачу модага кереп китте. Ирада Әюпова исә бу фикер белән килешмәвен әйтте. “Без һәрбер кешенең ихтыяҗын канәгатьләндерергә тиеш. Аэропортта, театрда намаз уку бүлмәләре булу – гадәти хәл. Циркта намаз уку бүлмәсен ачу учреждение эшчәнлегенә начар йогынты ясады дип уйламыйм. Татарстанда дини кешеләр бик күп, безнең министрлыкта да андыйлар бар һәм мин бу гамәлне хөрмәт итәм”, - диде ул.

Ирада Әюпова “Үзгәреш җиле” фестивале турында да әйтте. “Ун ел элек татар эстрадасында барысы да диярлек фонограммага җырлый иде. Хәзер артистлар ачык форматта эшләргә тырыша. Бу – дөнья таләбе. Җырчылар хәзер тере тавышка җырларга курыкмый. Һәм моңа “Үзгәреш җиле” сәбәпче дип уйлыйм. Әгәр журналист теге яки бу концерт турында яза икән, ул артистларның фонограммага яки тере тавышка җырлавы турында да язарга тиеш. Артист та сәхнәгә чыга икән, “мин фонограммага җырлыйм” дип ачыктан-ачык әйтсен. Шул вакытта тамашачы белән артист арасында ышаныч булачак. Эстрада – мәдәниятнең халыкка иң якын булган тармагы. Халыкны алдарга ярамый. Мин үзем дә начар җырламыйм, ләкин тавышымны студиядә яздырсалар, опера җырчысы булачакмын”, - диде министр.

“Елга нәтиҗә ясап шуны әйтәсе килә: ел, чынлап та, якты вакыйгаларга бай булды. Журналистлар үз язмаларын бер яклы гына язмасын иде. Гел мактап яки яманлап кына язарга кирәкми, ике якны да күрергә кирәк. Юлдагы күлдәвекне кемдер пычрак дип уйлаячак һәм торак-коммуналь хуҗалык хезмәткәрләрен сүгәчәк. Ә кемдер анда йолдызлар чагылышын күрәчәк. Шуңа күрә уй-ниятләр гел позитив рухта булсын, дөньяның ачык, матур төсләрен генә күрсәк иде”, - диде Ирада Әюпова.