Ислам банкингы: мөселман булмаганнар да файдалана ала

Ислам банкингы традицион банк системасыннан аерылып тора һәм дингә таяна. Белүебезчә, Коръәндә риба тыела, чөнки дин буенча җиңел генә алган табыш хупланмый. Процентларны ышанычка нигезләнгән партнерлык алыштыра.

Ислам банкингыннан Россиядә төрле диндәге кешеләр файдалана алачак. Мөселман булу шарт түгел.

- Татарстан Республикасында Ислам финанслары буенча 15 елдан артык эш алып барыла, ислам финанслары принципына нигезләнгән аерым проектлар тормышка ашырыла. 2008 елда Ислам үсеш банкы белән бердәм хезмәт турында меморандум төзелде, - дип билгеләп үтте ТР Икътисад министры Мидхәт Шәһиәхмәтов.

Аның сүзләренчә, партнерлык финанслары секторы актив үсә. Бүген ислам икътисады дөнья икътисадының аерылгысыз өлеше булып тора, ә Ислам финанславы активларының суммар күләме экспертлар тарафыннан 2025 елга $5 трлн. доллар дәрәҗәсендә булыр дип фаразлана.

Россиянең 4 төбәгендә узачак экспериментның максаты –ислам банкингы өлкәсендәге проблемаларны ачыклау һәм хокукый киртәләрне юк итү.
Дәүләт Думасы депутаты, Салым һәм бюджет буенча комитет әгъзасы Айрат Фәррахов сүзләренчә, бу канун Россиядәге 20 миллион мөселманга файдага булачак. 

Татарстан Мөфтие Камил Сәмигуллин сүзләренчә, Диния Нәзарәтендә ислам финанслары темасы 10 елдан артык күтәрелеп килә. Шушы вакыт эчендә кадрдар әзерләүдә дә, продуктлар эшләүдә, яки сертификация уздыруда яхшы нәтиҗәләргә ирешелгән. 

Республикада хәләл кыйммәтле кәгазьләр, ипотека, дебет картасы, автомобиль, көнкүреш техникасы сатып алуга мурабаха һәм иджар стандартлары буенча кичектереп түләү кебек продуктлар тәкъдим ителә, шулай ук Россия компанияләренең акцияләренең шәригать нормаларына туры килү-килмәвен тикшерү өчен Sahih Invest мобиль кушымтасы эшләнгән. Бу продуктларның төп уңышы шунда, алар банкирларның һәм дин белгечләренең уртак эше нәтиҗәсе булып тора, дип белдерде Камил Сәмигуллин.

Аның сүзләренчә, Татарстан хәләл акчалар белән эшли белә һәм ул ислам банкингы буенча экспериментка тулысынча әзер. Нәзарәтнең "Амаль" Финас йорты, Ак барс банкы, Ак Барс Капитал, Мир бизнес банк, Иджара Лизинг һәм Нур Финанс кебек финанс оешмалары белән уртак продуктлары бар. Әмма закон үз көченә керү белән базарда хәләл банк продуктлары турындагы тәкъдимнәр белән тагын да күбрәк барлыкка киләчәк. Аларның чыннан да хәләл принципларга таянып эш итүен җитди контрольгә алу таләп ителүе хакында әйтте мөфти.

Гүзәл Насыйбуллина