#Язмалар 08 сентябрь 2019, 11:57

Камил хәзрәт Сәмигуллин: “Тавыш бирү мөмкинлеге – Аллаһының рәхмәте”

08 сентябрь 2019, 11:57

Казанның 7нче гимназиясендә, шулай ук 88нче мәктәбендә Бердәм сайлау көне бәйрәм рухы алган. Татар һәм рус телләрендә җырлар яңгырый, сәүдә – ярминкә оештырылган.

Скопировать ссылку

Камил хәзрәт Сәмигуллин: “Тавыш бирү мөмкинлеге – Аллаһының рәхмәте”

– Беренчеләр булып, гадәттәгечә, пенсионерлар килде. Алар һәрвакыт актив бит безнең. Тәүге мәртәбә тавыш бирүче яшьләргә бүләкләр әзерләнде. Сайлау тыныч бара, – диде 214нче сайлау участогы рәисе Андрей Бикбов.

Казанның 88нче мәктәбенә урнашкан 279нчы сайлау участогы ишеген дә иртәнге 7 сәгатьтә бер төркем әбиләр ачып кергән.

– Көнебезне әбиләр фатихасында башладык. Халык активлык күрсәтә, тавыш бирергә киләләр. Сайлауга куелган партияләрнең һәркайсыннан күзәтүчеләр катнаша. “Чиста сайлаулар өчен” корпусы вәкилләре дә бар монда, – диде 279нчы сайлау участогы рәисе Светлана Фугина.

Без сөләшеп торган мәлдә сайлау участогына гадәти киемдә Татарстан мөфтие Камил хәзрәт Сәмигуллин килеп керде. Ул залдагы халыкка тыйнак кына сәлам бирде, һич масаймыйча чират торып бюллетень алды һәм тавыш биргәч, залдагы халыкка баш кагып, чыгып та китте. Камил хәзрәт Сәмигуллинны мәктәп ишегалдында туктатып, уй – фикерләрен сорадым. Ул җавапларын бисмилла әйтеп башлады.

– Сайлауларда тавыш бирү мөмкинлеге – Аллаһының рәхмәте. Шушы мөмкинлектән файдаланырга кирәк, мин дә тавыш бирдем. Татарстаныбызда ел саен 20-30 мәчет ачыла. Ике-өч атна саен бер мәчет ачыла, дип әйтергә була. Мондый иреклек кайчан бар иде?! Тормыш яхшырганнан-яхшыра бара. Ил-көннәребез имин булсын. Хәдисләрдә: “Сез ничек булсагыз – җитәкчеләр шундый”, – дип әйтелгән. Без җитәкчеләр өчен җаваплы, шунлыктан, лаеклыларны сайлау мәслихәт, – диде Камил хәзрәт Сәмигуллин.

Татарстан мөфтие мөселманнарны Гашура көне (9 сентябрь) белән дә котлады.

Кызыклы яңалыкларны күзәтеп бару өчен безнең МАХ каналына кушылыгыз.

##ВыбираюМойТатарстан #МойТатарстан #ВыборыРТТМ #ВыборыТатарстан #8сентября2019 #ГоссоветРТ