Казан урамнары буйлап тәгәрмәчле мич йөри?!

Әлеге мичнең хуҗасы Гадел Бариев белән мин Чувашиядә узган Федераль Сабан туенда таныштым. Ул чагында Гадел, тирләп-пешеп, Сабантуй кунакларына коймак пешереп ята иде. Әбиләренеке кебек мичтә пешкән ризыкларны авыз итәргә теләүчеләр дә шактый иде. «Балачак тәме килә», – дип, Гадел тәлинкә белән китереп куйган коймакларны ялтыратты гына халык.

Әллә берәр сере бармы соң бу коймакларның, дип, мин дә егеттән пешерү алымнары турында сорашам.
– Бер сере дә юк. Гап-гади коймаклар. Мичтә пешкәнгә генә үзенчәлекле килеп чыга. Рецептын әбиләрдән сораштым. Сөт, сыек май, тәменчә шикәр, тоз салабыз, – дип елмая эшкуар.

Үзенчәлекле мичләрне Гадел Удмуртиядән күреп кайткан икән. Шунда ук аны Татарстанга да кайтартырга уйлаган.
– Әле күптән түгел генә эшли башладык. Шулай да безнең белән кызыксынучылар күп. Татарстанда камыр ризыкларын яраталар бит. Башта, нинди мич икән бу, дип кызыксынып киләләр, аннан ризыклар белән сыйланалар, – ди Гадел.

Әлеге мичне инде Казан халкы да күреп өлгергәндер. Гадел аның белән парк, скверларга чыга, Сабан туйларына йөри. «Бигрәк җайлы инде, кая барсаң да, мич үзең белән, машинага гына тагасы», – дип елмая егет. Биредә коймак кына түгел, өчпочмак, бәлеш, вак бәлеш, бөккәннәр дә пешереп була.