Казанда яңа IT-парк ачылды

- Кадерле дуслар, бездә бүген өч зур вакыйга - Республика көне, шәһәр көне һәм дә иң матур урында-Кабан күле буенда яңа IT-парк барлыкка килде. Ул инновацион технологияләрне үзенә җәлеп итү урыны булыр, тармак үсешенә этәргеч бирер, - диде Президент Рөстәм Миңнеханов. Ирек Фәйзуллин да үзенең чыгышында IT-паркка уңышлы эшчәнлек теләде.

“Бәшир Рәмиев исемендәге IT-парк” - Татарстанда югары технологияләр өлкәсендәге проектларны үстерүгә корылган өченче технопарк. Казанда 2009 елда һәм Чаллыда 2012 елда технопарклар ачылган иде инде. Яңа технопарк 47,4 мең квадрат метр мәйданны били. Ул элекке “Спартак” аяк киемнәре фабрикасы бинасында барлыкка китерелде. Технопарк ике блоктан гыйбарәт. Беренчесе-“Спартак” фабрикасының 7 катлы элекке бинасын колачлый. Өч һәм биш катлы яңа янкормаларга балалар ИТ-паркы, киберарена, киберполигон, бизнес-инкубатор, почта бүлекчәсе, конференция заллары, резидент-компанияләр офислары, даруханә һәм башка хезмәтләр урнаша. 

Кибераренадагы киберспорт залында матчлар үткәреләчәк. Әлеге киберарена Идел буендагы иң зуры һәм яхшы җиһазландырылганы санала бүгенгә. Балалар IT-паркы 2 мең квадрат метр мәйданны били. Анда 5 яшьтән 18 яшькә кадәрге берьюлы 100 бала шөгыльләнә алачак. Түгәрәкләр эшчәнлеге юнәлешләре: робот техникасы, биотех, “акыллы йорт”, виртуаль һәм өстәмә яссылык, 3D-модельләштерү, программалаштыру, сәнгать, эшкуарлык һәм башкалар. 

Икенче кат цифрлы китапханәгә-коворкингка бирелгән. Бизнес-инкубатор илебездәге һәм якын чит илләрдәге инновацион проектларны җәлеп итәчәк. Шул инновацион проектлар-стартаплар Татарстанда сынау рәвешендә гамәлгә ашырып каралачак. Яңа IT-парк резидентлары ягъни шул бинада эшләячәк компанияләр 17 миллиард сум керем алыр, ә дәүләткә 1,6 миллиард сум салым күчерер, дип уйланыла. ИТ-паркта 4 меңгә якын эш урыны барлыкка килә.
Бәшир Рәмиев - совет галиме, уйлап табучысы. Ул “Урал” сериясендәге һәм “Стрела” электрон хисаплау машиналарын уйлап тапкан.