Рөстәм Миңнеханов Россия Герое Тимур Гыймрановның әти-әнисенә «Алтын Йолдыз» тапшырачак

Бу хакта «Татар-информ»га геройның әтисе Илдар Гыймранов хәбәр иткән. КА-52 вертолеты экипажы командиры Тимур Гыймранов 2026 елның 20 мартында хәрби бурычын үтәгәндә һәлак булды. Ул штурман-оператор Илья Кужлев белән ДНР һәм Днепропетровск өлкәсе чигендә дошманның җир өсте объектларын юк итү буенча заданиене үтәгән.

Заданиедән кайтып килгәндә, вертолетка дошман пилотсыз очкычлары һөҗүм иткән. Һөҗүм нәтиҗәсендә вертолетның сул канаты җимерелгән һәм ул яна башлаган. Тимур Гыймранов идарәне саклап калып, вертолетны кырга утырта алган. Аның профессиональлеге нәтиҗәсендә борттагы боекомплект детонацияләнмәгән.

Экипаж вертолеттан чыгып өлгергән, әмма соңрак аларга яңадан дошман БПЛАсы һөҗүм иткән. Алган яраларыннан Тимур Гыймранов һәм Илья Кужлев һәлак булган.

«Мин улым өчен чиксез шат»

Сугышчан очышлар вакытында күрсәткән батырлыгы, хәрби бурычын үтәгәндәге фидакарьлеге өчен Тимур Гыймрановка үлгәннән соң Россия Герое исеме бирелде. Тиешле указны Россия Президенты Владимир Путин имзалаган. Геройның әтисе Илдар Гыймранов сүзләренчә, ул улына югары дәүләт бүләге бирелүе турында шушы көннәрдә генә белгән.

«Миңа улымның часть командиры шалтыратты һәм бу хәбәрне җиткерде. Шатмы ул, юкмы икәнен әйтүе кыен, әмма мин улым өчен чиксез шат. Мин аны һәрвакыт герой дип саный идем, бүләге бармы — юкмы», — дип сөйләгән ул.

Илдар Гыймранов соңгы көннәрдә улының хезмәттәшләреннән күп шалтыратулар килүен һәм аларның гаиләне мөһим вакыйга белән котлавын да әйткән.

Гыймрановлар гаиләсе якындагы шимбәдә Казан Кремленә чакырылган. Анда Татарстан Рәисе Рөстәм Миңнеханов аларга батырларча һәлак булган улларының «Алтын Йолдыз» медален тантаналы рәвештә тапшырачак.